TAQSIṬ TIS 50

Snat n tlawin iẓewren

MKUL m’ara d-​sseɣlin lhemm ɣef yiman-​nsen, At Isṛayil ţɛeggiḍen ɣer Yahwa. Yahwa yeţţarra-​yasen-​d awal, yeţţak-​asen-​d imwellhen iẓewren akken a ten-ɛiwnen. Adlis Iqedsen isemma i yemwellhen-​agi leqwaḍi (inezzurfa). Yacuɛa yella d lqaḍi amezwaru. Ɛutniyil, Ihud akk-​d Camgar d kra n leqwaḍi nniḍen i t-​id-​itebɛen. Lameɛna ger wigad meṛṛa i gɛawnen At Isṛayil, llant snat lxalat yeţţusemman Dabuṛa akk-​d Yaɛil.

Dabuṛa d nnbi i tella. Yahwa yeţxebbiṛ-​iţ ɣef wayen ara yeḍrun ɣer zdat, neţţat tessawaḍ lexbaṛ-​agi i wegdud. Dabuṛa tella daɣen d lqaḍi. Teţɣimi i tili seddaw n tezdayt ɣef yiwet n tiɣilt. At Isṛayil meṛṛa ţṛuḥun ɣur-​es akken a sen-​tefru timsal-​nsen.

Di zzman-​nni, Yabin yella d agellid n tmurt n Kanɛan. Yesɛa 900 ikeṛṛusen n ṭṭrad. S lɛeskeṛ-​is iǧehden nezzeh, Yabin issers azaglu ɣef tuyat n wat Isṛayil. Aneḥkam n lɛeskeṛ n ugellid Yabin isem-​is Sisara.

Yiwen wass, Dabuṛa tceggeɛ ɣer yiwen lqaḍi yeţţusemman Baraq, tenna-​yas: ‘Atah wayen i d-​inna Yahwa: “Ddem 10 000 n yergazen, tawiḍ-​ten ɣer wedrar n Tabur. Ɣer dinna ara n-​ssaliɣ Sisara. Imiren a k-​fkeɣ tazmert swayes ara t-​tɣelbeḍ neţţa d lɛeskeṛ-​is.”’

Baraq yenna i Dabuṛa: ‘Ad ṛuḥeɣ, ma teddiḍ yid-​i.’ Dabuṛa tedda yid-​es, lameɛna tenna-​yas: ‘Ur teţţawiḍ ara ccan m’ara ten-​neɣleb, axaṭer ger ifassen n tmeṭṭut ara d-​isellem Ṛebbi Sisara.’ D ayen i geḍran.

Baraq iṣubb-​ed seg wedrar n Tabur akken ad immager lɛeskeṛ n Sisara. Yahwa yesseɣli-​d imiren-​nni aḥemmal n waman iɣef ur bnin ara. Aṭas n yeɛdawen i gemmuten. Lameɛna Sisara, neţţa, iṣubb-​ed seg ukeṛṛus-​is, dɣa yerwel.

Iɛedda kra n lweqt, Sisara yewweḍ ɣer uqiḍun n Yaɛil. Teɛreḍ-​it ad ikcem ɣer daxel, tefka-​yas ad isew ayefki. Sisara yebda yeţnudum, s lemɣawla teɣder-​it tnafa. Imiren, Yaɛil teddem-​ed tagust n uqiḍun, tessenta-​yas-​ţ deg uqerru. Mbeɛd, mi d-​yewweḍ Baraq, tessken-​as aqerru n Sisara! Akken i twalaḍ, yeḍra yakk wayen i d-​tenna Dabuṛa.

Ɣer taggara, yemmut ula d agellid Yabin. At Isṛayil ɛacen di lehna kra n lweqt.

Inezzurfa 2:14-22; 4:1-24; 5:1-31.