EBʼ LAJ Israel keʼtijok chiru li Jehobʼa naq keʼxchʼik ribʼ saʼ chʼaʼajkilal. Joʼkan naq li Yos kixtaqlahebʼ laj kʼamol bʼe re naq teʼtenqʼaaq. Li Santil Hu naxye naq ebʼ laj kʼamol bʼe wankebʼ choʼq aj raqol aatin. Laj Josue kiwank choʼq aj kʼamol bʼe ut choʼq aj raqol aatin. Naq laj Josue kikamk, li Jehobʼa kixkʼe laj Otniel, laj Ehud ut laj Samgar choʼq ebʼ aj raqol aatin. Joʼkan ajwiʼ, wiibʼ li ixq keʼtenqʼank rehebʼ laj Israel. Aʼan xDebora ut li xJael.

Li xDebora naxnaw kʼaru tkʼulmanq saʼ li kutan chaalel. Joʼkan naq li Jehobʼa kixye re li xDebora naq tixnumsi li esil chiru li tenamit. Li xDebora aj raqol aatin ajwiʼ. Naq li xDebora wank rubʼel jun li cheʼ, ebʼ laj Israel nekeʼwulak rikʼin re naq teʼtenqʼaaq chi xtuqubʼankil ruhebʼ li xchʼaʼajkilal.

Saʼebʼ li kutan aʼin laj Jabin wank choʼq awabʼej re Canaan ut wank 900 xbʼelebʼaal chʼiichʼ. Chixjunilebʼ laj puubʼ li nekeʼkʼanjelak rikʼin laj Jabin kawebʼ ribʼ, joʼkan naq naabʼalebʼ laj Israel keʼkanaak choʼq xmoos. Laj Jabin kixkʼe laj Sisara chi jolomink saʼ xbʼeenebʼ laj puubʼ.

Saʼ jun kutan li xDebora kixbʼoq laj Barac, laj raqol aatin, ut kixye re: ‹Li Jehobʼa kixye: Kʼamebʼ saʼ li tzuul Tabor 10.000 chi winq ut aran tinqʼaxtesi aawe laj Sisara ut ebʼ laj puubʼ re naq taaqʼaxebʼ ru›.

Tojaʼ naq laj Barac kixye re li xDebora: ‹Laaʼin tinxik wi tatxik chiwix›. Li xDebora kixsume xik chirix laj Barac. Abʼan li xDebora kixye re laj Barac: ‹Moko laaʼat ta tkʼeheʼq aaloqʼal, xbʼaan naq li Jehobʼa tixqʼaxtesi laj Sisara saʼ ruqʼ jun li ixq›. Qilaq chanru kikʼulmank aʼin.

Laj Barac kikubʼeek chaq saʼ li tzuul Tabor chi xtawbʼal laj Sisara ut ebʼ laj puubʼ. Li Jehobʼa kixbʼaanu naq tbʼutʼunq li naʼaj ut naabʼalebʼ laj puubʼ keʼkamk. Joʼkan naq laj Sisara kiʼelk saʼ li xbʼelebʼaal chʼiichʼ ut kiʼelelik.

Chirix chik aʼan laj Sisara kiwulak saʼ rochoch li xJael. Li ixq kiroksi laj Sisara ut kixkʼe leech chi rukʼ. Naq laj Sisara kirukʼ li leech kikubʼeek xwara. Tojaʼ naq li xJael kixchap jun li cheʼ ut kixchʼik saʼ xjolom laj Sisara. Naq laj Barac kiwulak rikʼin li xJael, li xJael kixkʼut chiru naq kamenaq chik laj Sisara. Chi joʼkan kitzʼaqlok ru li kixye xDebora.

Chirix chik aʼan keʼxkamsi laj Jabin ut sa chik keʼwank ebʼ laj Israel.