Icisimicisyo 50: Abanakasi Bobilo Abasipile
ILI abaIsilaeli bakatasiwa, balilila kuli baYehoba. BaYehoba babasuka pa kubapa intangisi isisipile. Baibolo ileta isi intangisi ati abasololwesi. Josyua aali e musololwesi wa kutanga, kabili nabambi abasololwesi abakonkelepo pali ye ni Otiniyeli, Ekudi na Syamigali. Pano pa bantu abofwa Isilaeli banakasi bobilo amasina abo ni Debola na Yaeli.
Debola ali mwanakasi uwakusimika. BaYehoba balamubula ifyebo fya mpindi ya kuntangile, naye alabula abantu ifi baYehoba balabila. Debola kabili musololwesi. Alekala munsi ya citi ca cibale mu calo ca mapili, ne bantu balesa kuli ye ati abofwe ne makatasyo bakwete.
Pali iyi mpindi Yabini euli imfumu ya Kanani. Ali ne ngolofwana sya nkondo 900. Ifita fyakwe fikosele ukwakuti icakweba’ti abaIsilaeli abengi babapatikisya ukuba abasya bakwe Yabini. Umukulu wa fita fyakwe Yabini ni Sisela.
Kambi kasuba Debola atuma intumi ku musololwesi Balaka, kabili ne kumubula ati: ‘BaYehoba balabila ati: “Bula abalalume 10,000 ne kuya nabo ku Lupili lwa Taboli. Kulya eko nakuleta Sisela kuli webo. Kabili eko nakukupela ukucimfya pali ye na pali bamusika bakwe.”’
Balaka abula Debola ati: ‘Kani mwebo mwakuya na nebo eli nakuya.’ Debola akonka, pano alabila kuli Balaka ati: ‘Nangabe’fyo ulwendo ulu mukenda talukamuletelenipo ubuleme pakuti baYehoba bakamupela Sisela mu minwe ya mwanakasi.’ Kabili fyenke’fi e fyacitika.
Balaka atentemuka Ulupili lwa Taboli mu kukumanya ifita fyakwe Sisela. Ukwakubulo’kucetekela baYehoba kabaleta ubulobe, kabili ifita ifingi ifyali ifilwani kafinwina. Pano Sisela kaseluka pa ngolofwana yakwe ne kubutuka pansi pa makasa.
Panuma ya kapindi kanini Sisela aisa kwi sema lyakwe Yaeli. Yaeli amwingisya ne kumupela amandili. Camulenga ukusinsila, kabili impindi iinini aponena na mutulo utulemene. Eli Yaeli abula ne lupopo lwa kwi sema ne kulupopa mu mutwi wa mwalalume imbifi. Mukupelako, ili Balaka aisa, amulanga apalele Sisela ninsi mufwile! Kansi wabona ati ifyalabile Debola fyalibele bucine.
Mukupelako Imfumu Yabini nayo baipaya, kabili abaIsilaeli baba mu butende nakabili pa mpindi inini.
Abasololwesi 2:14-22; 4:1-24; 5:1-31.
Ifyakwipusya
- Abasololwesi nibani, kabili simbulapo bamo?
- Niwisa mulimo uulibelele Debola alukupyunga, kabili findo usansyamo?
- Ili abaIsilaeli babatinisye ku Mfumu Yabini ne cilolo ca fita, Sisela, niesa masiwi ukufuma kuli baYehoba Debola aeba Umusololwesi Balaka, kabili alabila ati nibani abakapelwa umucinsi?
- Kani Yaeli alanga syani ati mwanakasi umusipile?
- Cindo cacitika ili Imfumu Yabini yafwa?
Ifyakwipusya na fimbi
- Pendeni Abasololwesi 2:14-22.
Kani abaIsilaeli balililetele syani ubukali bwa baYehoba pa bene benka, kabili cindo tungasambililako? (Sol. 2:20; Ifisi. 3:1, 2; Esic. 18:21-23)
- Pendeni Abasololwesi 4:1-24.
Cindo abanakasi ba buKlistu bangasambililako muli bulelo ku cakubwenako ca cicetekelo ne kusipa kwakwe Debola na Yaeli? (Sol. 4:4, 8, 9, 14, 21, 22; Ifisi. 31:30; 1 Kol. 16:13)
- Pendeni Abasololwesi 5:1-31.
Kani ulwimbo lwa kucimfya ulwakwe Balaka na Debola lwaba syani koti litembelo ukulola kuli Amagedono iilukwisa? (Sol. 5:3, 31; 1 Ifye. 16:8-10; Fisu. 7:9, 10; 16:16; 19:19-21)
