ຜູ້ຍິງທີ່ກ້າຫານສອງຄົນ
ບົດ 50
ຜູ້ຍິງທີ່ກ້າຫານສອງຄົນ
ເມື່ອຊົນຍິດສະລາເອນຕົກເຂົ້າສູ່ຄວາມເດືອດຮ້ອນ ເຂົາຮ້ອງຫາພະເຢໂຫວາ. ພະເຢໂຫວາຕອບເຂົາໂດຍໃຫ້ມີຜູ້ນຳທີ່ກ້າຫານຊ່ວຍເຫຼືອເຂົາ. ພະຄຳພີເອີ້ນຜູ້ນຳເຫຼົ່ານີ້ວ່າຜູ້ຕັດສິນ. ໂຢຊວຍເປັນຜູ້ຕັດສິນຄົນທຳອິດ ແລະຜູ້ຕັດສິນບາງຄົນພາຍຫຼັງເຂົາຊື່ວ່າໂອດນຽນ ເອຫຶດແລະຊາມຄາເຣ. ແຕ່ສອງຄົນຜູ້ທີ່ຊ່ວຍຊົນຍິດສະລາເອນນັ້ນເປັນຜູ້ຍິງ ຊື່ເດໂບລາແລະຢາເອນ.
ເດໂບລາເປັນຜູ້ພະຍາກອນ ພະເຢໂຫວາແຈ້ງຄວາມໃຫ້ນາງຮູ້ຂ່າວກ່ຽວກັບອະນາຄົດ ແລະນາງຈຶ່ງບອກຜູ້ຄົນເຖິງເລື່ອງທີ່ພະເຢໂຫວາຕັດ. ເດໂບລາເປັນຜູ້ຕັດສິນດ້ວຍ. ນາງນັ່ງໃຕ້ຕົ້ນຕານຕົ້ນນຶ່ງຢູ່ຊົນນະບົດທີ່ເນີນພູເຂົາ ແລະຜູ້ຄົນມາຫານາງເພື່ອຂໍຄວາມຊ່ວຍເຫຼືອກ່ຽວກັບບັນຫາຂອງຕົນ.
ເວລານີ້ຢາບີນເປັນກະສັດແຫ່ງການາອານ. ເຂົາມີລົດຮົບມ້າ 900 ຄັນ. ກອງທັບເຂົາມີອຳນາດຫຼາຍຈົນເຖິງຊົນຍິດສະລາເອນຫຼາຍຄົນໄດ້ຖືກບັງຄັບໃຫ້ເປັນຄົນໃຊ້ຂອງຢາບີນ. ແມ່ທັບຂອງກະສັດຢາບີນຊື່ຊີເຊຣາ.
ມື້ນຶ່ງ ເດໂບລາໃຊ້ຄົນໄປເອີ້ນບາຣາກຜູ້ຕັດສິນ ແລະບອກເຂົາວ່າ: ‘ພະເຢໂຫວາຕັດດັ່ງນີ້ວ່າ: “ຈົ່ງໄປເກນເອົາ 10,000 ຄົນແລ້ວນຳພວກເຂົາໄປພູເຂົາທາໂບເຣ. ເຮົາຈະນຳຊີເຊຣາໃຫ້ມາຫາເຈົ້າທີ່ນັ້ນ. ແລະເຮົາຈະໃຫ້ເຈົ້າມີໄຊຊະນະເໜືອເຂົາແລະກອງທັບຂອງເຂົາ.” ’
ບາຣາກບອກເດໂບລາວ່າ: ‘ເຮົາຈະໄປຖ້າເຈົ້າຈະໄປດ້ວຍກັນກັບເຮົາ.’ ເດໂບລາກໍ່ໄປດ້ວຍ ແຕ່ນາງກ່າວແກ່ບາຣາກວ່າ: ‘ເຈົ້າຈະບໍ່ໄດ້ຮັບກຽດສຳລັບໄຊຊະນະນັ້ນ ເພາະວ່າພະເຢໂຫວາຈະມອບຊີເຊຣາໄວ້ໃນມືຂອງຜູ້ຍິງຄົນນຶ່ງ.’ ແລະນີ້ຄືສິ່ງທີ່ເກີດຂຶ້ນຈິງ.
ບາຣາກລົງຈາກພູເຂົາທາໂບເຣເພື່ອໄປພົບກັບກອງທັບຂອງຊີເຊຣາ. ທັນໃດນັ້ນພະເຢໂຫວາບັນດານໃຫ້ເກີດນ້ຳຖ້ວມ ແລະພວກທະຫານຝ່າຍສັດຕູຈຳນວນຫຼາຍຖືກຈົມນ້ຳຕາຍ. ແຕ່ຊີເຊຣາກໍ່ລົງຈາກລົດຮົບມ້າຂອງຕົນແລະແລ່ນໜີໄປ.
ບໍ່ດົນຫຼັງຈາກນັ້ນຊີເຊຣາກໍ່ມາເຖິງກະໂຈມຂອງຢາເອນ. ນາງເຊີນເຂົາເຂົ້າມາ ແລະໃຫ້ດື່ມນ້ຳນົມ. ຈຶ່ງເຮັດໃຫ້ເຂົາງ້ວງນອນ ບໍ່ດົນກໍ່ນອນຫຼັບສະນິດ. ແລ້ວຢາເອນຈຶ່ງເອົາຫຼັກແຫຼມທີ່ຕອກຂຶງກະໂຈມນັ້ນຕອກເຂົ້າໄປໃນຫົວຂອງຊາຍຊົ່ວຄົນນີ້. ຕໍ່ມາເມື່ອບາຣາກມາເຖິງ ນາງຈຶ່ງຊີ້ໃຫ້ເຂົາເບິ່ງຊີເຊຣານອນຕາຍຢູ່! ດັ່ງນັ້ນເຈົ້າເຫັນບໍ່ວ່າສິ່ງທີ່ເດໂບລາບອກໄວ້ນັ້ນໄດ້ເກີດຂຶ້ນຈິງ.
ໃນທີ່ສຸດກະສັດຢາບີນກໍ່ຖືກຂ້າດ້ວຍ ແລະຊົນຍິດສະລາເອນມີຄວາມສະຫງົບສຸກອີກຊ່ວງເວລານຶ່ງ.
ພວກຜູ້ຕັດສີນ 2:14-22; 4:1-24; 5:1-31.
