Mairin Wal Kupia Karna Ba
Sturka 50
Mairin Wal Kupia Karna Ba
ISRAEL uplika nani ba trabil ra diman pyua ra, Jehova ra wini bangwan. Witin ta briaia uplika kupia karna nani yabi wal, ansika yaban, help munbia dukyara. Baibil ba, witin nani ra wihta nina makisa. Jasua ba pas wihta kan, bara witin ningkara wihta wala nani kan ba: Otonîl, Ihud bara Samgar. Sakuna upla wal help munan ba mairin kan, witin nani nina Dibora bara Jail kan.
Dibora ba prapit mairin kan. Jehova mita kaina tanira dia takai ba dukyara maisapahki kan, bara Dibora Jehova dia wi kan ba upla nani ra maisapahki kan. Dibora sin wihta mairin kan. Witin unta ra sila dusa kum munhtara iwi kan, bara upla nani ba witin ra bali kan ai pâtka nani ba wapnika mangki help munbia dukyara.
Baha pyua ra Jabin ba Kenan kingka kan. Witin war waginka nani 900 bri kan. Ai aiklaklabra daknika ba uba karna kan ba mita Israel uplika ailal ba Jabin albika takan. Jabin aiklaklabra daknika wihtka nina ba Sisara kan.
Yu kum Dibora mita wihta Berak ra wini, win: ‘Jehova ba naku aisan: “Tebur ilka ra was, 10.000 waitna asla dauks. Yang daukamna Sisara balbia man wal war aiklabaia. Bara witin nani ba, yang man mihtam ra mangkamni.” ’
Bara Berak ba Dibora ra win: ‘Man yang wal wama kaka lika wamna.’ Dibora ba wan, sakuna Berak ra win: ‘Naha aiklabanka mayunra ba maikan kabia apia; kan Jehova bui Sisara ba mairin kum mihta ra mankbia.’ Bara baku takan.
Berak ba Tebur ilka wina mayara iwi wan Sisara aiklabaia daknika aikuki prawaia dukyara. Ban wina, Jehova lisamra tara kum dingkan, bara waihla nani ailal ba rungwi tiwan. Sakuna Sisara ba, ai waginka wina iwi plapan.
Pyu kunhku bilara, Sisara ba Jail tentka ra wan. Witin mita dimbia paiwan, diman pyua ra, bip tyalka laya wiria yaban. Din ningkara yapan daukan, bara mahka yapan. Bara Jail dus tatwa kum ai tentka wina brih, Sisara lal ra sabi dingkan. Baha ningkara, Berak balan pyua ra, Sisara pruan kan ba saki marikan! Dibora aisan kan ba tnata aimakan.
Tnata kat king Jabin ra sin ikan; bara Israel uplika nani ba laman laka ra iwi bangwan.
Wihta nani 2:14-22; 4:1-24; 5:1-31.
