Kgaolo 50: Basadi ba Babedi Bao ba Nago le Sebete
GE Baisiraele ba be ba wela mathateng, ba be ba bitša Jehofa. Jehofa o be a ba araba ka go ba nea baetapele bao ba nago le sebete gore ba ba thuše. Beibele e ba bitša baahlodi. Joshua e be e le moahlodi wa pele gomme baahlodi ba bangwe bao ba tlilego ka morago ga gagwe e be e le Othiniele, Ehudi le Shamogara. Eupša ba babedi ba batho bao ba ilego ba thuša Baisiraele e be e le basadi bao ba bitšwago Debora le Jaele.
Debora e be e le moporofeta wa mosadi. Jehofa o be a mo tsebiša dilo tša nakong e tlago ke moka yena a botša setšhaba dilo tšeo Jehofa a di boletšego. Debora e be e bile e le moahlodi. O be a agile tlase ga sehlare sa mopalema nageng ya dithaba gomme batho ba be ba etla go yena gore a ba thuše ka mathata a bona.
Ka nako yeo, Jabini e be e le kgoši ya Kanana. O be a na le dikoloi tša ntwa tše 900. Madira a gagwe a be a le matla kudu moo Baisiraele ba bantši ba ilego ba gapeletšwa go ba makgoba a gagwe. Molaodi wa madira a Kgoši Jabini o be a bitšwa Sisera.
Ka letšatši le lengwe, Debora o ile a roma motho yo mongwe gore a yo bitša Moahlodi Baraka gomme a re go yena: ‘Jehofa o re: “Tšea banna ba 10 000 o ye le bona Thabeng ya Thabora. Ke tla tliša Sisera go wena gona moo. Ke tla dira gore o mo fenye le madira a gagwe.”’
Baraka a re go Debora: ‘Ke tla ya ge e ba o ka ya le nna.’ Debora a ya le yena eupša a re go yena: ‘Ga se wena yo a tlago go retwa ge ntwa e fentšwe, ka gobane Jehofa o tla dira gore Sisera a bolawe ke mosadi.’ Se ke seo se ilego sa direga.
Baraka o ile a theoga Thabeng ya Thabora gore a yo lwa le madira a Sisera. Gateetee Jehofa a neša pula e kgolo gomme madira a mantši a Sisera a kgangwa ke meetse a hwa. Eupša Sisera yena a fologa koloi ya gagwe ya ntwa ke moka a tšhaba ka maoto.
Ka moragonyana Sisera o ile a tla tenteng ya Jaele. Jaele a mo amogela gomme a mo nea maswi. Se se ile sa mo otsediša gomme go se go ye kae a ya ka boroko. Bjale Jaele a tšea tšhipi ya tente a e kokotela hlogong ya monna yo yo mobe. Ka morago ge Baraka a etla, Jaele a mmontšha setopo sa Sisera! Ka gona o ka bona gore seo Debora a se boletšego se ile sa direga.
Mafelelong Kgoši Jabini le yena o ile a bolawa gomme Baisiraele ba phela ka khutšo gape ka nakwana.
Baahlodi 2:14-22; 4:1-24; 5:1-31.
Dipotšišo
- Baahlodi e be e le bomang, gomme maina a ba bangwe ba bona ke afe?
- Ke tokelo efe e kgethegilego yeo Debora a bego a na le yona, gona seo se be se akaretša eng?
- Ge Baisiraele ba be ba tšhošetšwa ke Kgoši Jabini le Sisera molaodi wa madira a gagwe, ke molaetša ofe wo o tšwago go Jehofa woo Debora a ilego a o botša Moahlodi Baraka, gomme Debora o ile a re ke mang yo a bego a tla retwa ge ntwa e fentšwe?
- Jaele o ile a bontšha bjang gore e be e le mosadi yo a nago le sebete?
- Go ile gwa direga’ng ka morago ga ge Kgoši Jabini a hwile?
Dipotšišo tša tlaleletšo
- Bala Baahlodi 2:14-22.
Baisiraele ba ile ba ipakela bogale bja Jehofa bjang, gomme re ka ithuta thuto efe tabeng ye? (Baa. 2:20; Die. 3:1, 2; Hesek. 18:21-23)
- Bala Baahlodi 4:1-24.
Ke dithuto dife tša mabapi le go ba le tumelo le sebete tšeo basadi ba Bakriste lehono ba ka ithutago tšona mohlaleng wa Debora le wa Jaele? (Baa. 4:4, 8, 9, 14, 21, 22; Die. 31:30; 1 Bakor. 16:13)
- Bala Baahlodi 5:1-31.
Koša ya phenyo ya Baraka le Debora e ka dirišwa bjang e le thapelo mabapi le ntwa yeo e tlago ya Haramagedone? (Baa. 5:3, 31; 1 Dikor. 16:8-10; Kut. 7:9, 10; 16:16; 19:19-21)
