ETYI ova Isilayeli vamona ononkhumbi, veliyava ku Yehova. Yehova evekumbulula mokuveavela ononkhalamutue mbakola omutima pala oku-​vekuatesako. Mombimbiliya ononkhalamutue ombo ankho mbutiwa ovakoyesi. Josue wali omukoyesi wotete, iya konyima akulandula ovakoyesi vamue ankho vatiwa o Otiniel, na Eude na Sangale. Anthi, ovanthu ve-​vali vakuatesileko ova Isilayeli ovakai, ankho vatiwa o Debora na Jael.

Debora ankho omuuli. Yehova ankho umupopila ovi-​puka mavikamoneka komutue, iya Debora evipopila ova-​nthu. Tupu Debora ankho omukoyesi. Debora ankho uumphama mombuelo yomuti womulunga komphunda, iya ovanthu ankho oko veya okuita ekuateso liovitateka viavo.

Komuvo una, ohamba yomo Kanaa ankho o Jabim. Jabim ankho una 900 omatemba ovita. Omasualali ae ankho apama unene, iya ova Isilayeli ovanyingi avakuluminyua okukala ovapika va Jabim. Onkhalamutue yomafualali Ohamba Jabim ankho utiwa Sisera.

Onthiki imue, Debora watuma okuihana omukoyesi Barake emutolela okuti: ‘Yehova wati: “Pola 10.000 ovalume, oende navo Komphunda yo Tabor. Oko, ame mandyikuetela Sisera. Mandyikukuatesako opo ufinde Sisera nomafualali ae.”’

Anthi, Barake wakumbulula Debora okuti: ‘Ame mandyiende vala inkha noove wenda.’ Debora aende nae, mahi emupopila okuti: ‘Haveko mofindi, mokonda Yehova maave Sisera pomaoko omukai.’ Iya atyiende umue ngotyo.

Barake walauka komphunda yo Tabor pala okukelivasa nomafualali a Sisera. Yehova aetako ombila onene, iya omafualali omanyingi a Sisera aankhila momaande. Sisera atuluka ketemba liae akahateka.

Kapakalele omuvo omunyingi, Sisera eya mekaka lia Jael. Jael emutumu okunyingila, emupe omahini. Omahini oo, emuavela otumphoki, liwa liwa alangalapo. Jael apolo otyimuti tyahongwa (omphehe) etyipapela momutue womulume oo ondingavivi. Konyima, etyi Barake ehika, Jael emulekesa Sisera wankhia. Ngotyo, etyi Debora apopile tyafuisuapo.

Konthyulo, Ohamba Jabim nayo yalekwa, iya ova Isilayeli avakondoka okukala vali nombembwa.