SAA Yizilayɛma kɔ ngyegyelɛ nu a, bɛsu bɛfɛlɛ Gyihova. Gyihova dua adekilevolɛ akɛnrasesebɛma nwo zo boa bɛ. Baebolo ne fɛlɛ adekilevolɛma ɛhye mɔ ndɛnebuavolɛma. Dwɔhyua a le ndɛnebuavolɛ mɔɔ lumua a, na ndɛnebuavolɛma mɔɔ rale ɔ nzi la bie mɔ a le Ɔteneɛle, Yehɛde nee Hyamega. Noko menli mɔɔ boale Yizilayɛma la anu nwiɔ le mraalɛ mɔɔ bɛfɛlɛ bɛ Dɛbola nee Gyeeyɛle a.

Dɛbola le ngapezonli raalɛ. Gyihova ka kenlebie edwɛkɛ kile ye, na ɔdaye noko ɔka mɔɔ Gyihova ɛha la ɔkile menli ne. Dɛbola eza le ndɛnebuavolɛ. Ɔta ɔtɛnla arɛlɛ bie abo wɔ awoka maanle ne ko anu, na menli badie bɛ ngyegyelɛ nwo moalɛ fi ye ɛkɛ.

Zɛhae mekɛ ye anu ɛnee Gyeeben a le Keenama belemgbunli a. Ɔlɛ konle mbulalɛ ehwili 900. Ɔluakɛ ye ɛlɔnema ne mɔ anwo yɛ se la ati Yizilayɛma dɔɔnwo rayɛle Gyeeben ngɛkɛlɛ. Gyeeben ɛlɔnema ne azo safohyenle kpanyinli a le Sesɛla.

Kenle ko Dɛbola zoanle manle bɛhɔvɛlɛle Ndɛnebuavolɛ Balake na ɔzele ye kɛ: ‘Gyihova se: “Fa mrenya 10,000 na kɔ Teebɔ Boka ne azo. Na mebava Sesɛla meayia wɔ wɔ ɛkɛ ne. Na meamaa wɔali ɔ nee ye ɛlɔnema ne anwo zo konim.” ’

Balake buale Dɛbola kɛ: ‘Saa ɛ nee me kɛhɔ ɛdeɛ a, menwɔhɔ.’ Dɛbola nee ye hɔle, noko ɔzele Balake kɛ: ‘Ɛnrɛnyia ɛ nyunlu wɔ konimlilɛ ne anzi, ɔluakɛ Gyihova baye Sesɛla amaa raalɛzinli.’ Na kɛ ɔrale ye la ɛne.

Balake tolole Teebɔ Boka ne na ɔhɔyiale Sesɛla ɛlɔnema ne. Arɛlevilɛ nu ala Gyihova manle azuyilɛ vale kpɔvolɛ ɛlɔnema ne, na dɔɔnwo wule. Noko Sesɛla vi ye ehwili ne anu dwule na ɔ guale ndwɛlɛ aze.

Mekɛ hɔle bie la Sesɛla radwule Gyeeyɛle sua nu. Ɔvale ye ɔhɔle ɛdanlɛ sua ne anu na ɔmanle ye meleke ɔnlonle. Ɛhye manle ɔbɔle ngɔsɔkɛ, na yeangyɛ ɔlafele botoo. Akee Gyeeyɛle vale ɛdanlɛ sua ne mbaka adakola ne ko na ɔvale ɔbɔle nrenya ɛtanevolɛ ne ati anu kyengye ɔbetanle azɛlɛ ne anwo. Amozii, mekɛ mɔɔ Balake rale la, ɔhilele ye Sesɛla mɔɔ ɛwu la! Yemɔti mɔɔ Dɛbola hanle la rale nu pɛpɛɛpɛ.

Awieleɛ kolaa ne bɛhunle belemgbunli Gyeeben noko, na Yizilayɛma nyianle anzondwolɛ wɔ mekɛ ekyi anu.