CHIʼ ri täq israelitas xeqaj pa kʼäx, xketa che Jehová che keʼutoʼ. Ri Jehová xeʼuto rumal laʼ xuya ajkʼamal täq bʼe chike rech keʼutoʼ. Ri Loqʼalaj Pixabʼ xubʼij jueces chike. Josué are xubʼan nabʼe juez, tekʼuriʼ chiʼ kamnäq chi ri Josué e kʼo chi nikʼaj jueces kibʼiʼ: Otniel, Ehúd xuqujeʼ Samgar. Tekʼuriʼ kebʼ chike ri winaq che xketoʼ Israel e ixoqibʼ, wa täq ixoqibʼ riʼ jun ubʼiʼ Débora jun chik ubʼiʼ Jael.

Débora xubʼan ajqʼaxal utzij ri Ajawaxel. Jehová xuya ubʼixik che su kbʼan pa täq qʼij petinäq, tekʼuriʼ Débora kuqʼaxej ubʼixik chike ri winaq su xubʼij Jehová che. Débora xuqujeʼ xubʼan juez. Kkubʼi chuxeʼ jun cheʼ pa ri juyubʼ (jïbʼ) tekʼuriʼ ri winaq keʼopan che utaʼik toqʼobʼ che.

Pa täq wa qʼij ri ajawinel rech ri Canaán are Jabín. Kʼo 900 täq ucarros rech chʼoj. Sibʼalaj nim kichoqʼabʼ ri rajchʼoj, rumal laʼ kʼi chike ri täq israelitas xkebʼan upatinel ri Jabín. Ri ajkʼamal bʼe chike ri rajchʼoj ri Jabín ubʼiʼ Sísara.

Xopan jun qʼij ri Débora xusikʼij ri juez Barac, tekʼuriʼ xubʼij wariʼ che: ‹Jehová xubʼij wariʼ: Cheʼakʼama bʼi 10.000 achijabʼ pa ri juyubʼ (jïbʼ) ubʼiʼ Tabor. Chilaʼ kinkʼam lo ri Sísara chawe. Tekʼuriʼ in kinya pa aqʼabʼ ri Sísara xuqujeʼ ri rajchʼoj›.

Barac xubʼij wariʼ che Débora: ‹Kinbʼek we katbʼe at wukʼ›. Débora xbʼek, tekʼuriʼ xubʼij che Barac: ‹Kyaʼ ta aqʼij rumal wajun chʼoj, rumal che Jehová kuya ri Sísara pa uqʼabʼ jun ixoq›. Are waʼ kbʼan na.

Barac xqaj lo che ri juyubʼ (jïb) ubʼiʼ Tabor rech kubʼan chʼoj rukʼ ri ajchʼoj rech ri Sísara. Xaq kʼteʼ, Jehová xutaq lo jun nim jabʼ tekʼuriʼ kʼi chike ri ajchʼoj xejiqʼik. Sísara xel bʼi pa ri ucarro tekʼuriʼ xanmajik.

Tekʼuriʼ ri Sísara xopan pa rachoch Jael. Ri Jael xubʼij che ri Sísara che kok bʼi pa rachoch, tekʼuriʼ xuya jubʼiqʼ (jbʼeʼ) leche che. Xpe jun nimalaj uwaram rumal wariʼ. Tekʼuriʼ Jael xukʼam jun cheʼ rech rachoch tekʼuriʼ xutitzʼ bʼi pa ujolom. ¡Chiʼ Barac xpetik, Jael xukʼut ri Sísara kamnäq chik chuwäch! Ri xubʼij Débora, xbʼantajik.

Kʼisbʼal re xkamsax ri ajawinel Jabín; tekʼuriʼ pa kebʼ oxibʼ junabʼ kʼot chi chʼoj pa Israel.