Tantara 50

Ampela Roe Nahery Fo

LAHA fa nahita fahasahiràna Israelita reo, le nitaray tamin’i Jehovah. Nanampy an-droze Jehovah, ka nanome an-droze mpitarike nahery fo vaovao. Mpitsara ro nikaìha’ty Baiboly mpitarike reo. Josoa ro mpitsara voalohane. Otniela, Ehoda noho Samgara ro nanarakarake aze tafara atoy. Fe nisy ampela roe nanampy ty vahoakin’Israely, Debora noho Jaela ty anaran-droze.

Mpaminanivavy Debora. Nampahitàn’i Jehovah aze ty raha hiseho amy hoavy, bakeo tantaràne amy vahoake reo kea ty raha novolànin’i Jehovah tamine. Mpitsara kea Debora. Tany feno vohitse kelikele zay ty nisy aze. Nipetrake tambany hazo ravinala zay teo avao ie. Niavy tamine teo iaby ty olo sahìra mba hahazo fanampia.

Tamy fotoa io, le Jabina ro mpanjakan’i Kanana. Nana sarety fandesy mialy 900 ie. Nahery biby ty tafik’i Jabina, ka maro ty Israelita ro nanjary mpanompone. Sisera ro filoha’ty tafik’i Jabina Mpanjaka io.

Ndraike andro le nampikaike an’i Baraka Mpitsara Debora, ka nivòla tamine hoe: ‘Ho’zao ty raha novolànin’i Jehovah: “Mangalà lahilahy 10 000, ka tarìho ho amy Vohitse Tabara eny roze. Hameako anao Sisera laha fa eny. Ka hataoko resinao ty tafine.” ’

Hoy Baraka tamin’i Debora: ‘Handeha aho, laha handeha hiarake amiko iha.’ Nandeha kea Debora, fe nivòla tamin’i Baraka ie hoe: ‘Tsy iha mihitsy ro hahazo voninahitse laha fa maharesy, fa ampela raike zay ro hampiasàn’i Jehovah mba hamono an’i Sisera.’ Zay vatane ty raha niseho.

Nijòtso baka amy Vohitse Tabara teny Baraka, mba hamonjy ty miaramilan’i Sisera. Tampotampoke teo, le nandefa rano be Jehovah, ka maro tamy miaramilan’i Sisera reny ro nimaty tan-drano tao. Fe Sisera niala tami’ty saretine, ka nilomay.

Afake fotoa vitsivitsy, le niavy tamy lain’i Jaela tao Sisera. Nampilìrin’i Jaela tan-tranone tao ie, ka nameane ronono. Nanjary niroro ie, ka le nierotsy biby, laha fa bakeo. Nangalake fantsike bevata Jaela, ka natsatone tami’ty lohan’i Sisera raty fanahy teo. Laha fa niavy Baraka tafara atoy, le natoron’i Jaela aze ty fatin’i Sisera! Hitanao ami’zay fa marina safàn’i Debora iny.

Novonòa kea Jabina Mpanjaka tamy farane, ka niada ndraike ty Israelita.

Mpitsara 2:14-22; 4:1-24; 5:1-31.