KWAKUTSI njalo ema-Israyeli nakangena enkingeni, acele lusito kuJehova. Abewaphendvula ngekuwaniketa baholi labanesibindzi labebatawuwasita. LiBhayibheli libabita ngekutsi tikhulu. Joshuwa waba sikhulu sekucala, futsi labanye balabo labalandzela emuvakwakhe kwakungu-Othiniyeli, Ehudi naShamgari. Kodvwa lababili kuletikhulu letatisita ema-Israyeli kwakungemakhosikati. Emagama awo kwakunguDebhora naJayeli.

Debhora abengumphrofethikati, futsi Jehova abemtjela tintfo lebetitakwenteka, bese yena utitjela bantfu. Abephindze abesikhulu. Abevamise kuhlala ngaphasi kwesihlahla selisundvu eveni lelinetintsaba. Bantfu bebeta kuye batewutfola lusito etinkingeni tabo.

Ngalesosikhatsi Jabini abeyinkhosi yaseKhenani. Abenetincola temphi letingu-900. Emabutfo akhe abenemandla lamakhulu, kangangekutsi ema-Israyeli aphoceleka kutsi abe tisebenti takhe. Indvuna yemphi yakhe kwakunguSisera.

Ngalelinye lilanga Debhora watfumela kutsi kubitwe Bharaki sikhulu, watsi kuye: ‘Jehova ukuyala utsi: “Tsatsa emadvodza langu-10 000 uwahole uye eNtsabeni iThabori. Ngitamhunga Sisera ete kuwe, futsi ngitamnikela esandleni sakho yena nemabutfo akhe.”’

Bharaki wamphendvula watsi: “Ngitakuya nangabe nawe utawuhamba nami.” Debhora wahamba naye, kodvwa watsi kuye: ‘Ludvumo ngeke lube lwakho, ngoba Jehova utawunikela Sisera esandleni semfati.’ Nguloku-ke lokwenteka.

Bharaki wehla eNtsabeni iThabori kute ahlangane nemasotja aSisera. Kusesenjalo Jehova wenta kutsi kube nemanti lamanyenti, futsi emasotja amita kuwo. Kodvwa Sisera washiya incola yakhe wabaleka.

Ngekuhamba kwesikhatsi Sisera wefika ethendeni laJayeli. Jayeli wamemukela wamngenisa ekhatsi endlini, futsi wamupha nelubisi. Lwamenta wetela, futsi wagcina asatunywe butfongo. Jayeli wesuka watsatsa sipikili lesikhulu wasishayela ekhatsi enhloko yalendvodza lembi. Utsite nakefika Bharaki, Jayeli wamkhombisa lapho Sisera abefele khona. Ngako nyalo sewuyabona kutsi lentfo leyashiwo nguDebhora yagcine yenteke njani.

Ekugcineni neNkhosi Jabini yabulawa, ema-Israyeli aba nekuthula kwesikhashana.