BAINHIRA ema Izraél hetan susar, sira bolu ba Jeová atu tulun. Jeová hatán hodi haruka ulun-naʼin sira neʼebé brani. Bíblia bolu ulun-naʼin sira-neʼe juis. Josué mak juis primeiru, no juis balu tuirmai mak Otniel, Eúde no Samgar. Maibé, ema naʼin-rua neʼebé ajuda Izraél mak feto naran Débora no Jael.

Débora profeta ida. Jeová fó-hatene Débora kona-ba futuru, no Débora fó-hatene povu. Débora mós juis ida. Nia tuur iha ai-hun ida nia okos iha foho, no povu bá toʼo nia atu hetan ajuda ho sira-nia problema.

Iha tempu neʼebá Kanaan nia liurai mak Jabin. Nia iha kuda-karreta funu nian 900. Ninia tropa forte tebes no sira obriga ema Izraél barak atu sai Jabin nia atan. Liurai Jabin nia xefe-tropa naran Sísera.

Loron ida, Débora haruka ema atu bolu Juis Barac mai. Débora hatete ba Barac: ‘Jeová dehan: “Lori mane naʼin-10.000 toʼo Foho Tabor. Haʼu sei lori Sísera toʼo neʼebá. No haʼu sei halo ó manán nia no ninia tropa.”’

Barac hatete ba Débora: ‘Haʼu bá se Ita mós bá hamutuk ho haʼu.’ Débora tuir, maibé nia hatete ba Barac: ‘Maski Ita sei manán, Ita sei la simu glória, tanba Jeová sei halo Sísera monu ba feto nia liman.’ No ida-neʼe akontese duni.

Barac tun husi Foho Tabor atu hasoru Sísera nia soldadu sira. Derrepente, Jeová halo rai-nabeen ida, no soldadu inimigu barak mout. Maibé Sísera tun husi ninia kuda-karreta no halai-sees.

Lakleur Sísera mai toʼo Jael nia tenda. Jael konvida Sísera tama, no fó susubeen ba nia. Ida-neʼe halo Sísera matan-dukur, no lakleur nia toba-dukur. Jael foti ai-pregu no baku tama ema aat neʼe nia ulun. Kuandu Barac mai, Jael hatudu Sísera neʼebé mate! Nuneʼe, ita bele haree katak buat neʼebé Débora hatete sai loos.

Ikusliu, sira mós oho Liurai Jabin, no ema Izraél hetan dame ba tempu uitoan.