KELOMASI idwe luka Isirael toma ationis, amonyakinete Yawe. Abongonokini Yawe kesi kopone kalo aijaanakin kesi engarenok luatiting aingarakin kesi. Enyarit Ebaibuli engarenok lu ikatubok. Yosua ngesi atubon losodit, ido atubok ice luatupakinete ngesi kesi enyaritai Otiniel, Ekud, ka Samugar. Konye iarei kotoma otunga luengarakinete idwe luka Isirael kesi angor nuanyaritai Debora ka Yael.

Arai Debora anabi. Ejaanakini Yawe ngesi akiro nuongaren, ido alimonokini ngesi itunga nu abala Yawe. Erai bobo Debora atubon. Kiboienenei kokwap edukut kotoma akwap nakiukon, kolosenenete itunga mamake kanu atiokisio kec.

Arai Yabin ekabaka loko Kaanan kapak kana. Ejaatar ngesi agalin nuka ejie 900. Egogong akejore noi, ido abuiki idwe luka Isirael luipu araun ibulesin luka Yabin. Lokapolon loka ajore naka Ekabaka Yabin ngesi enyaritai Sisera.

Adiopepaaran, konyarau Debora Atubon Barak kosodi alimokin ngesi ebe: ‘Ebala Yawe ebe: “Koyanga ikiliok 10,000 ido kingarenik kesi abear Moru Tabor. Eong da eriuni Sisera ne ijai kangina. Ainakini ijo aitelekar ngesi ka ajoreke.”’

Kolimok Barak Debora ebe: ‘Arai kiupar ijo keong, alosi.’ Kolot Debora, konye kolimok ngesi Barak ebe: ‘Mam ijo idumuni aibuses naarai einakini Yawe Sisera akan naka aberu.’ Ido nu kesi apotu iswamaunos.

Kijesun Barak kwap Emoru Tabor airiamun ka Sisera nepepe ka ajoreke. Koinak Yawe akalele angesun, kolumosi luipu kotoma ajore nakasurup. Konye kodoku Sisera kagalike kokere kakekeje.

Akaulo na apak naedit, kolom Sisera owema loka Yael. Abu isukunyik ngesi toma, ido koinak ngesi akile adis. Koinak na ngesi ajootonor, ido kisunyak ajootor ajo nuipu. Kosodi Yael alemun eloit loka ewema, kibubuik eloit ngol akou naka etunganan loaronon lo. Akaulo, kedolu do Barak, kitodik ngesi Sisera edaunit atwanare! Aso ipedori ijo aanyun ebe nuabala Debora apotu oraunos nukabeit.

Nawasia, korarai Ekabaka Yabin da, kosodete do idwe luka Isirael adumun ainapakin bobo kanu apak naedit.