FA Baiseraele ba tsena mo mathateng ba kopa thuso kwa go Jehofa. Jehofa o ba araba ka go ba naya baeteledipele ba ba pelokgale gore ba ba thuse. Baebele e bitsa baeteledipele bano baatlhodi. Joshua e ne e le moatlhodi wa ntlha, mme baatlhodi bangwe ba ba neng ba tla morago ga gagwe e ne e le Otheniele, Ehude le Shamegare. Mme mo bathong ba ba thusang Baiseraele, go na le basadi ba babedi ba ba bidiwang Debora le Jaele.

Debora ke moporofeti wa mosadi. Jehofa o mo naya tshedimosetso ka ga isagwe, mme ene o bolelela batho se Jehofa a se buang. Gape Debora ke moatlhodi. O nna ka fa tlase ga setlhare sengwe sa mokolane mo kgaolong e e dithaba, mme batho ba tla kwa go ene gore a ba thuse ka mathata a bone.

Mo nakong eno kgosi ya Kanana ke Jabine. O na le dikara tsa ntwa di le 900. Masole a gagwe a nonofile thata jaana mo bontsi jwa Baiseraele ba ileng ba patelediwa go nna batlhanka ba gagwe. Moeteledipele wa masole a ga Jabine o bidiwa Sisera.

Letsatsi lengwe Debora o roma mongwe go ya go bitsa Moatlhodi Barake, mme o mo raya a re: ‘Jehofa a re: “Tsaya banna ba le 10 000 mme o ba etelele pele go ya kwa Thabeng ya Tabore. Fa o le koo, ke tla tlisa Sisera kwa go wena. Mme ke tla dira gore o mo fenye ene le masole a gagwe.”’

Barake o raya Debora a re: ‘Ke tla tsamaya fa e le gore le wena o tla ya le nna.’ Debora o tsamaya le ene, mme gone o raya Barake a re: ‘Ga o kitla o galalediwa ka ntlha ya phenyo eno, ka gonne Jehofa o tla tsenya Sisera mo seatleng sa mosadi.’ Mme go nna fela jalo.

Barake o ya kwa Thabeng ya Tabore go ya go kopana le masole a ga Sisera. Ka tshoganyetso fela Jehofa o dira gore go nne le morwalela, mme bontsi jwa masole a baba a kgamiwa ke metsi. Mme Sisera o fologa kara ya gagwe ya ntwa a bo a tshaba.

Morago ga lobakanyana Sisera o tla mo tenteng ya ga Jaele. O mo laletsa gore a tsene, a bo a mo siela mashi. Mashi ano a dira gore a otsele mme go ise go ye kae o a thulamela. Go tswa foo, Jaele o tsaya lomapo lwa tente a bo a lo kokotela mo tlhogong ya monna yono yo o bosula. Moragonyana, fa Barake a tla, Jaele o mmontsha Sisera yo o suleng! Ka jalo, o kgona go bona gore go ne ga direga fela jaaka Debora a ne a buile.

Kgabagare Kgosi Jabine le ene o a bolawa, mme Baiseraele ba tshela ka kagiso gape ka lobakanyana.