Makani 50: Bakaintu Bobilo Basicamba
NIBANJILA mumapenzi bana Isilayeli, balilila Jehova. Jehova wabavwiila kwiinda mukubapa basololi basicamba kuti babagwasye. Alimwi mu Bbaibbele baitwa kuti mbabetesi. Josyuwa ngowakali mubetesi wakutaanguna, alimwi bakali kumuccilila kwakali Otiniyeli, Ehudi a Samagala. elyo bakaintu bobilo ibagwasya bana Isilayeli ngu Debola a Jaeli.
Debola musinsimi. Jehova ulamwaambila ziya kucitika kumpela, amana ulabaambila bantu Jehova nzyaamwaambila. Debola alimwi mubetesi. Ukkala munsi lyakakunka naa kanzuma mucisi camalundu, alimwi bantu balaboola kuli nguwe kuzyi kujana lugwasyo kumapenzi aabo.
Aciindi aawa Jabini ngomuleli wa Kenani. Ulijisi nkalaki zyankondo zili 900. Basikalumamba bakwe mbayumu kapati cakunga bunji bwabana Isilayeli nibatayandi caile kubapa kuba babelesi ba Jabini. Mupati wabasikalumamba ba Jabini wiitwa kuti Sisela.
Buzuba bumwi Debola wakaita Bbalaki mubetesi akumwaambila kuti: ‘Jehova waamba kuti ubweze basankwa bali 10,000 ubasololele ku Cilundu ca Taboli. Ooko ndiya kukuletela Sisela. Ndiya kucita kuti umuzunde abasikalumamba bakwe.’
Bbalaki waambila Debola kuti: ‘Ndilaunka ikuti naa undisindikile.’ Debola wamusindikila, pele wati kuli Bbalaki: ‘Tokapegwi bulemu kukuzunda ooku nkaambo Jehova ulamwaaba Sisela mumaanza aamukaintu.’ Eeci ncencico cacitika.
Bbalaki waselemuka a Cilundu ca Taboli kuzyi kulwana basikalumamba ba Sisela. Cakutayeeyelwa Jehova waleta meenda manji, ibunji bwabasinkondonyina baanywida meenda, eelyo bafwa. Pele Sisela waseluka ankalaki yakwe waccija.
Kwiinde buyo kaindi kaniini, Sisela waboola kutente lya Jaeli. Jaeli wamwiitila muŋanda akumupa mukupa. Eeci capa kuti afwe ŋonzi, eelyo woona cakumaniina. Kumane Jaeli wabweza nkanka yatente wamugagaila Sisela bubi mwali mumutwe. Aboole Bbalaki, Jaeli wamutondezya mutumba wa Sisela. Aboobo ulakonzya kubona kuti Debola ncaakaamba cakaba camasimpe.
Kumamanino awalo Mwami Jabini wajaigwa, aboobo bana Isilayeli balikwaya alimwi kwaciindi cisyoonto.
Babetesi 2:14-22; 4:1-24; 5:1-31.
Mibuzyo
- Mbabaani babetesi, alimwi mbabaani bamwi mazina aabo?
- Mulimo nzi waalubazu Debola ngwajisi, alimwi ino eeci cijatikizya nzi?
- Isilayeli naakakongwa a Mwami Jabini amupati wakwe wabasikalumamba wiitwa kuti Sisela, ino mulumbe nzi uuzwa kuli Jehova ooyo Debola ngwaakaambila Mubetesi Bbalaki? Alimwi ino ngwani Debola ngwaamba kuti nguuya kupegwa bulemu?
- Mbuti Jaeli mbwaatondezya kuti mukaintu sicamba?
- Ncinzi cacitika naafwa Mwami Jabini?
Mibuzyo aimwi
- Bala Babetesi 2:14-22.
Mbuti bana Isilayeli mbobakaliletela bukali bwa Jehova, alimwi nciiyo nzi ncotukonzya kwiiya kumakani aaya? (Bab. 2:20; Tus. 3:1, 2; Ezk. 18:21-23)
- Bala Babetesi 4:1-24.
Nziiyo nzi kujatikizya lusyomo alimwi abusicamba bamakaintu Banakristo basunu nzyobakonzya kwiiya kucikozyanyo ca Debola aca Jaeli? (Bab. 4:4, 8, 9, 14, 21, 22; Tus. 31:30; 1 Kor. 16:13)
- Bala Babetesi 5:1-31.
Mbuti lwiimbo lwakuzunda lwa Bbalaki a Debola mbolunga lwabelesyegwa kuba mupailo kujatikizya kuboola kwankondo ya Amagedoni? (Bab. 5:3, 31; 1 Mak. 16:8-10; Ciy. 7:9, 10; 16:16; 19:19-21)
