AKXNI li Israel tanukgolh ktaʼakglhuwit, pixlanka tasaskinikgoy Jehová. Chu Jehová kakgaxmatnilh chu kamakaminilh pulalinanin nema ni pekuankgoy xlakata nakamakgtayay. Biblia kawaniy uma xlakkaxtlawananin taʼakglhuwit. Josué wa xapulana xlakkaxtlawana taʼakglhuwit, chu amakgapitsi xlakkaxtlawananin taʼakglhuwit: Otniel, Ehúd chu Samgar. Pero chatiy tiku na kamakgtayalh li Israel lakpuskatin, xtukuwanikan Débora chu Jael.

Pero Débora palakachuwina. Jehová maxkiy tamakatsin xlakata tuku aku namin, chu Débora kamakatsini kristianos tuku wan Jehová. Débora na xlakkaxtlawana taʼakglhuwit. Tawila kxtampin kgantum mokgot kxlakni kasipijni chu kristianos lakgminkgoy xlakata Débora nakatalakkaxtlawa xtaʼakglhuwitkan.

Uma kilhtamaku Jabín wa mapakgsina xalak Canaán. Kgalhi 900 putlaw nema litlawakan guerra. Lu tliwakga wilakgolh xsoldados, wa xlakata makgapitsi li Israel kskujnin Jabín katlawakanit. Wantiku xapuxku xsoldados Jabín xtukuwani Sísara.

Akgtum kilhtamaku Débora tasanilh xlakkaxtlawana taʼakglhuwit xtukuwani Barac, chu waniy: Jehová wan, kamakaxti 10,000 lakchixkuwin chu kalipinkgo anta ksipi wanikan Tabor. Chu anta nakliminiyan Sísara. Chu akit naktlaway pi natlajaya Sísara chu putum xsoldados.

Barac waniy Débora: Komo nakintapina nakan. Débora alh, pero waniy Barac: Ni katitamalankilh mintukuwani xlakata uma guerra nema natlajaya wa xlakata Jehová namastay Sísara kxmakan chatum puskat namakgniy. Chu chuna lalh.

Barac alh anta ksipi wanikan Tabor xlakata nakatatanokglha xsoldados Sísara. Xalan Jehová makamilh akgtum lanka sen chu stakli chuchut, chu lhuwa tiku xtalamakgasitsin li Israel jikswakgolh. Sísara taktalh kxputlaw chu tsukulh tsalay.

Alistalh chalh kxchik Jael. Xla wanilh pi katanulh, chu maxkilh naway aktsu leche. Lilhtataputulh chu alistalh lhtatalh. Alistalh Jael tiyalh kgantum kiwi xatakankalhpitni chu liʼakgxtokgolh. ¡Alistalh akxni Barac milh, Jael masinilh Sísara xanin! Wantuku Débora xwanit chuna lalh.

Alistalh makgnika mapakgsina Jabín, chu nilu makgas kilhtamaku li Israel ni kgalhikgoy taʼakglhuwit.