Musi Vhaisiraele vha tshi dzhena khomboni, vho vha vha tshi lilela Yehova. Yehova a tshi vha fhindula nga u vha fha vharangaphanḓa vha sa ofhi uri vha vha thuse. Bivhili i vha vhidza vhahaṱuli. Yoshua o vha e muhaṱuli wa u thoma, vhaṅwe vho mu tevhelaho vho vha vhe Othiniele, Ehudu na Samugara. Fhedzi vhavhili vha vhathu vhe vha thusa Isiraele vho vha vhe vhasadzi, Debora na Yaele.

Debora o vha e muporofita wa musadzi. Yehova o vha a tshi mu fha mafhungo nga ha tshifhinga tshi ḓaho, ene a vhudza vhathu. Debora o vha e muhaṱuli hafhu. O vha a tshi dzula fhasi ha muri shangoni ḽa thavhani, vhathu vha tshi ḓa khae u ṱoḓa thuso.

Nga itsho tshifhinga Yabini o vha e khosi ya Kanana. O vha e na goloi dza 900 dza nndwa. Mmbi yawe yo vha i na maanḓa lwe Vhaisiraele vhanzhi vha vha vhalanda vha Yabini. Muhulwane wa mmbi ya Khosi Yabini o vha a tshi pfi Sisera.

Ḽiṅwe ḓuvha Debora a vhidza muhaṱuli Baraka, a mu vhudza: ‘Yehova o ri: “Dzhia vhanna vha 10 000 u vha range phanḓa u ye Thavhani ya Thaboro. Henengei ndi ḓo u ḓisela Sisera. Nahone ndi ḓo u fha gundo nṱha hawe na mmbi yawe.”’

Baraka a vhudza Debora: ‘Ndi ḓo ya arali na iwe wa ṱuwa na nṋe.’ Debora a ṱuwa nae, fhedzi a ri kha Baraka: ‘A u nga khoḓiwi nga gundo, ngauri Yehova u ḓo ṋekedza Sisera tshanḓani tsha musadzi.’ Nahone zwa itea ngauralo.

Baraka a tsa Thavhani ya Thaboro a ṱangana na maswole a Sisera. Nga u ṱavhanya Yehova a ita uri mulambo u ḓale, nahone maswole manzhi a swina a nwela khothe. Sisera a shavha.

Nga murahunyana Sisera a ḓa denndeni ya Yaele. Yaele a mu vhidzela ngomu, a mu fha mafhi. A mbo ḓi farwa nga khofhe khulu nga u ṱavhanya. Yaele a dzhia tshibigiri tsha dennde a tshi ombela ṱhohoni ya munna. Musi Baraka a tshi ḓa, a mu sumbedza Sisera o faho! Zwe Debora a amba zwo vha ngoho.

Mafheleloni, Khosi Yabini na ene a vhulawa, nahone Vhaisiraele vha dovha vha vha na mulalo tshifhinganyana.

Vhahaṱuli 2:14-22; 4:1-24; 5:1-31.