AYISALAYELI pakusimana ni yipwetesi, akulilila cikamucisyo kwa Yehofa. Yehofa akwakamucisya mwakwapa acimlongola ŵakulimba mtima kuti ŵakamucisyeje. Baibulo jikusakolanga jemanjaji kuŵa ŵakwelusya. Yoswa ŵaliji jwakwelusya jwandanda, soni ŵane mwa ŵakwelusya ŵaŵapali panyuma pakwe ŵaliji Otaniyeli, Ehudi, soni Samagala. Nambo ŵakwelusya ŵane ŵaŵakamucisye Ayisalayeli ali acakongwe ŵakolanjikwa Debola, soni Yayeli.

Debola ali jwakulocesya jwacikongwe. Yehofa akusammanyisya yindu yam’bujo, kaneko jwalakwe nikwasalilaga ŵandu yaŵecete Yehofa. Debola alisoni jwakwelusya. Jwalakwe akusatama pasi pacitela ca mgwalangwa ku mkuli wa matumbi wa cilamboco, ni ŵandu akuyika kwa jwalakwe ni yakusawusya yawo kuti ŵakamucisye.

Pandaŵiji Yabini ni jwali mwenye jwa Kanani. Jwalakwe akwete magaleta ga ngondo gakwana 900. Likuga lya Asilikali ŵakwe lili lyamacili mnope mwati Ayisalayeli ŵakanganicisye kuŵa acikapolo ŵa Yabini. Mlongola jwa asilikali ŵa mwenye Yabini lina lyakwe lili Sisela.

Lisiku line Debola akumtumicisya utenga Balaki wakuti: ‘Yehofa asasile kuti: “Mjigale acalume 10,000 ni mjawule nawo ku Litumbi lya Taboli. Kweleko cinjimpa Sisela m’miyala mwenu. Cinjimkamucisya kumgomeka jwalakwejo yimpepe ni ŵangondo ŵakwe.”’

Balaki akumsalila Debola kuti: ‘Cinjawuleko naga wawojo akulongana ni une.’ Debola akulongana nawo, nambo akumsalila Balaki kuti: ‘Ngondoji ngampunda ligongo lya macili genu, ligongo Yehofa campelece Sisela m’miyala mwa jwamkongwe.’ Yeleyi ni yayikutendekwa.

Balaki akutuluka mwitumbi lya Taboli kuti asimane ni asilikali ŵa Sisela. Mwakusisimucisya Yehofa akutendekasya cikumba, ni asilikali ŵa acimmagongowo akumala kutiŵila m’mesi. Nambo Sisela akukwela ligeleta lyakwe nikutila.

Pali papite kandaŵi Sisela akwika ku tenti ja Yayeli. Jwalakwejo akum’ŵilanjila mkati, ni akumpa mkaka. Mkakawu ukumtendekasya lugono, kaneko akugona mpaka lugono. Kaneko Yayeli akujigala cisyano cakunjila tenti nikumkomela naco mumtwe mwa mundu jwakusakalaju. Pakwika Balaki, Yayeli akumlosya mtembo wa Sisela! Sambano akuyiwona kuti yaŵasasile Debola yila yitendekwe.

Pambesi pakwe mwenye Yabini nombe najo ŵawulajigwe, ni sambano Ayisalayeli akuŵasoni pamtunjelele kwa kandaŵi.