Historia 50

Chupa gunaa nadxibalú

ORA ca israelita que riuucabe lu guendanagana la? rucaacabe ridxi Jiobá. Laabe ricábibe laacaʼ ra rudiibe stale xaíque nadxibalú para gacané laacaʼ. Biblia na lácabe juez. Josué nga guca primé juez, ne xcaadxi juez despué de laabe nga: Otniel, Ehúd ne Samgar. Peru chupa gunaa nga gucané Israel, ne ca gunaa riʼ la? lácabe Débora ne Jael.

Débora la? naca ti gunaa ni riguixhená laabe. Jiobá rabi laabe ni chiguizaaca, ne laabe rábibe ca binni que ni Jiobá rabi laabe. Débora laaca naca juez. Laabe ribibe xaʼnaʼ ti yaga ziña ni nuu lu ca dani que, ne ca binni que riecaʼ ra nuube para gacanebe laacaʼ lu guendanagana sticaʼ.

Ca dxi riʼ Jabín naca rey stiʼ Canaán. Nápabe 900 carru ni ritindenebe, ne guiráʼ ca binni ridinde stibe guizáʼ nadípacaʼ. Ngue runi stale de ca israelita maʼ beeda gácacaʼ esclavu stiʼ Jabín. Xaíque stiʼ ca binni ridinde stiʼ Jabín la? láʼ Sísara.

Ti dxi la? Débora ribídxibe juez Barac ne rábibe laa: Jiobá guníʼ: Gucuaa 10.000 hombre ne yené laacabe lu dani láʼ Tabor, ne raqué zeedaniáʼ Sísara ra nuuluʼ. Ne naa zacaniáʼ lii para guni ganarluʼ laabe ne ca xpínnibe.

Peru Barac rábibe Débora: Ziaa pa lii chineluʼ naa. Débora rie peru rábibe Barac: Nin qué ziuu naróʼ stiuʼ neca guni ganarluʼ, purtiʼ Jiobá zudii Sísara lu náʼ ti gunaa. Ne ndiʼ nga ni raca.

Barac riete de lu dani Tabor que para guidxagalube ca soldadu stiʼ Sísara. Málasi bindaahua Jiobá laacabe, ne stale de laacabe rati. Sísara riete de lu carru stiʼ ne ruxooñeʼ.

Qué nindaadiʼ bidxiña Sísara ralidxi Jael. Laabe runi invitarbe laa chuʼ, ne rudiibe laa caadxi leche, ndiʼ ruchá bacaandaʼ lube ne nagueenda ca rásibe. Óraque Jael ricaa ti staca de ndaaniʼ lidxi ne rutaabini íquebe. ¡Despué, ora reeda Barac la? Jael ruluiʼbe laa Sísara maʼ guti! Guca ni guníʼ Débora que.

Despué la? ruuticabe rey Jabín; ne pur caadxi dxi ca israelita que rápacabe guendariuudxi.

Jueces 2:14-22; 4:1-24; 5:1-31.