ÓRNI israelitas rioʼ ló galnagan ranabyibu lóo Jehová par gacné layibu. Né Jehová racapy layibu, por ngú raxelbu buñ ni nap balory ni guisanir nislóyibu par gacné layibu. La Biblia raniʼ layibu jueces. Josué góc primer juez, né stipnés jueces ni goyoʼ después de láabu góc laa Otniel, Ehúd né Samgar. Per chop buñ ni gocné a Israel gocyibu buñgonaʼ, chop buñgonaʼ reʼ góc laayibu Débora né Jael.

Débora góc toib buñgonaʼ ni raniʼ xí gac dzú ni sietra, láabu raibybu gudx Israel xí ni ná Jehová. Débora láaca gócbu juez. Láabu gorúbu xan toib yac laidy dainy, né buñ rieed ronoʼbu par gacnébu buñ ni cadudy ló galnagan.

Ló dzúcu Jabín rony mandary Canaán. Napbu 900 carret ni goyaʼtzaay nosi par tzanéyibu ló guerr. Napbu xidalguixo soldad né por ngú xidal israelitas noʼ xan xomandary Jabín. Buñguieeu ni rony mandary guirá soldad reʼ laabu Sísara.

Goyoʼ toib dzú, Débora raxelcaʼ juez Barac né raibybu, Jehová goní ndeʼ: Cuaʼ 10,000 buñguieeu né biné layibu dainy Tabor né lagarycu goni que Sísara guidxin ro nóolo. Né naʼ goni que looy gonylo gann Sísara né guirá soldad ni noʼ né láabu.

Barac raibybu Débora: Tzaaya lagarycu pal looy tzélo né naʼ. Débora rasaguel, per raibybu a Barac: Diti looy guisanadx buñ por ni gonylo gann layibu, portín Jehová guiduidybu lagary que toib buñgonaʼ guigaity Sísara. Né scú gocni.

Barac rietjbu laidy dainy ni laa Tabor par guitzaglóobu soldad ni sieed né Sísara. Tisintiempsi, Jehová ranitló layibu né toib guiérodann, né guirá soldad ni nac enemig xtuny Jehová reʼ nís. Sísara rietj lainy xcarret né raxonybu.

Diti xiroʼ ór, Sísara radxinbu lagary ro rabés Jael, né Jael raiby a Sísara que tudybu lanioʼ, né raduidybu tidxo lech reʼ Sísara. Ndeʼ rony que ranás toib bacaʼalnix Sísara. Ór cú Jael racaʼ toib estak né ratzaʼisbu láani guic Sísara. ¡Órni Barac radxiin, Jael ralooy láabu a Sísara ma gueʼet nac! Ni goní Débora birebuʼni.

Radxiin midid rioʼ ni ragaity Jabín ni rony mandary Canaán, né por xidal íz raguaʼyibu goxt.