BAIBAL chung ah Ruth ti mi ca-uk pakhat nan hmuh lai. Hi cu Israel ram ah biaceihtu nih an uk lio hna caan i a rak nung mi innchungkhar pakhat kong he aa tlai mi tuanbia a si. Ruth cu Moab ram in nutung no pakhat a si; amah cu Pathian miphun Israel mi a si ve lo. Sihmanhsehlaw Ruth nih a hmaan mi Pathian Jehovah kong a hngalh tik ah, Jehovah cu a dawt ngaingai. Naomi cu Jehovah kong hngalh awk Ruth a rak bawmtu nutar pakhat a rak si.

Naomi cu Israel minu a si. Israel ram chung i mangṭam a rak tlun lio ah amah le a vapa le a fapale pahnih cu Moab ram ah an rak pem. Cun nikhat cu Naomi a vapa cu a rak thi. Cu hnu ah Naomi a fapale hna nih Ruth le Orpah an ti mi Moab minu pahnih kha nupi ah an ṭhit hna. Sihmanhsehlaw kum 10 hrawng hnu ah Naomi a fapale pahnih cu an thi ve. Naomi le khi nu pahnih hna cu an ngaih a rak chia ngaingai! Atu ah Naomi cu zeidah a tuah cang lai?

Nikhat cu Naomi nih amah miphun hna sin ah kir awk ah khual hlapi tlawn awk ah a rak i tim. Ruth le Orpah cu amah he um an duh caah an rak zulh. Sihmanhsehlaw tlawmpal an kal hnu ah, Naomi cu khi nu hna sin ah aa mer i: ‘Va kir cang u law nanmahle nan nule sin ah va um cang u,’ tiah a ti hna.

Naomi nih khi nu pahnih cu i ṭhennak ah a hnamh hna. Cutikah Naomi cu an dawt ngaingai caah an ṭap. Cun annih nih: ‘Kan kir lai lo! Nangmah he na miphun sin ah kan kal ve ko lai,’ an ti. Sihmanhsehlaw Naomi nih: ‘Ka fanule hna, va kir hrimhrim ko u. Nan inn cio ah va um u law nan caah a ṭha deuh lai,’ tiah a ti hna. Cucaah Orpah cu inn lei ah cun a kir ṭhan. Sihmanhsehlaw Ruth cu a kir ve lo.

Naomi cu a sin lei aa mer i: ‘Orpah cu a kir cang. Nang zong amah he inn ah cun va kir ve ko,’ tiah a ti. Asinain Ruth nih: ‘Nangmah kaltak awk ah ka lem len hlah! Na sin ah ka kalter ve ko. Na kalnak ah ka kal ve lai i na umnak ah ka um ve lai. Na miphun cu ka miphun an si ve lai i, na Pathian cu ka Pathian a si ve lai. Na thihnak ah ka thi lai i cuka ah cun vui ka si ve lai,’ tiah a ti ṭhan. Ruth nih cubantuk in a chim tik ahcun Naomi nih kir awk ah a fial ṭhan ti lo.

A donghnak ah an pahnih in Israel ram cu an phan. Cuka ah cun khua an sa. Cu lio cu barli zun caan a si caah Ruth cu lo chung ah rian a rak ṭuan. Boaz an ti mi pa nih amah cu a lo chung ah barli zunnak nawl a pek. Boaz a nu cu aho a si ti nan hngal maw? Amah cu Jeriko khuami Rahab kha a si.

Nikhat cu Boaz nih Ruth cu: ‘Na konglam vialte le Naomi sin i na ṭhatnak vialte kha ka theih cang. Na nu le na pa le na ram na kaltak i cu hlan i na hngalh bal lo mi miphun sin ah na umnak kong zong ka hngalh. Jehovah cu na cung ah ṭha ko seh!’ tiah a ti.

Cutikah Ruth nih: ‘Bawipa na ka zangfah ngaingai ko. Hi bantuk in zangfahnak in na ka chawnh caah ka lung hna a ngam ngai ngai ko,’ tiah a leh. Boaz nih Ruth cu a duh ngai ngai i, a rauh hlan ah an i ṭhi-um. Mah nih cun Naomi lung a lawmhter ngai ngai! Ruth le Boaz nih Obed ti mi an fapa upa bik an hun ngeih tik ah Naomi cu aa lawm chinchin. A hnu ah Obed cu David pu ah a cang. David kong cu a hnu ah tampi kan hngalh te lai.

Ruth Baibal cauk.