BIBLIA gine be dagdele, garda soggwen nai nugad Rut. Sunmagnai dule wargwen e gwenadganmar ebbenne gudigusmaladgi, Israelgi juezmar negdagmamai unni. Rut dina, yaagwa Moab neggwebur ginedi geb Babdummad e neggwebur Israel e sorda suli. Auggine Rut, Babdummad sunsoged Jehovásig ibmar durdasgua, nue Jehová bali naigusad. Muuggwa Noemí nugadi, Rut bendasad Jehová siggi ibmar durdaggega.

Noemí, Israel ginedid. Israelgi mas galaggudgua, Noemí e sui bogwa Moab neggweburse megnadmalad, geb e masmala warbogwadi eba nadmarmogad. Ibagwengi Noemí sui burgwenoniggid. Sorbali, Noemí masmala, omegan Moab ginmalad niggunonimalad; we omegan nugnanaed, Rut geb Orpa. Auggine 10 años saar nasad sorbali, Noemí masmala warbober burgwenonimarmogad. ¡Mandur nabed! ¿Ibu emisgindi Noemí imagsunnoe?

Ibagwengi Noemí gannar e dulemarse nae soggalid, diggasur gaamagdoe. Rut, Orpa bogwa Noemígi bangubisurmala, degsoggu, Noemí bali nadmala. Igarba suiddi nanasmaladgi, Noemí we omeganga soggalid: ‘Gannar bemar negse bemar nae. Agine bur bemar gudigumalo, bemar nangan walig’.

Noemí naed iduar, Noemí omegan wagar usa. Rut, Orpa bogwa nue bomala, ar wemarde nue Noemí sabmalad. Soggarmala: ‘¡Suli! Anmar be bali namarmogoe be dulemarse’. Geb Noemí abinsogde: ‘Bemardi gannar naer gebed. Bur nued bemar gudiguoe be dulemar abargi’. Degsoggu Orpa gannar e negse nadsunna. Auggine Rut dina nadsuli.

Noemí gannar Rutga soggali: ‘Orpa bad nade. Be eba namoga’. Auggine, Rut abin imagde: ‘¡Mer anga soge, naye! An beb nabie. Bia be naddibe, an beb namogoe, bia be megnaddibe, aagi an megnamogoe. Be neggwebur an neggweburga gumogoe geb be Babdummad an Babdummadga gumogoe. Bia be burgoe, aagi an burgwemogoe, geb agine an digmarmogoe’. Rut we ibmar sogsagua, Noemí egi bar alamassuli gannar barmidega.

Ebober we omegan nabbis Israelse owarmagdabmarsunna. Aagi megdabmala. Abgayala Rut yog sabburba arbaali, ar ibmar weed ibagangi owarmasad. Rut, dule Booz nugad nagnugangi ibmar wesa, ar Booz sogedba. ¿Be wisi doa Booz e nana? Rahab, Jericó neggwebur ginedi.

Ibagwengi Booz, Rutga soggalid: ‘An iddosdae sunmagmala, be ibmar nuegan Noemíga imagdiid siggi. An wisi be sergangi be bangusa geb be neggweburgi be banguarbali, geb neggwebur dagdisulidse be megnoniggi. ¡Jehová beg ibmar nuegan imasan gadina!’.

Rut abin sogde: ‘Be dule nued dae. Ibmar nuegan be anga sogsadba nued iddo be an imasa’. Booz nued Rut dagge geb sanar gussulidgi na niggusmala. ¡We ulale Noemí nue yeeriddoali! Ar bur Noemí nue yeeriddogusa Rut, Booz bogwa gebbe goe susugwa niggunonimargu, Obedye we goe onugsalesa. Sorbali Obed, David e dadga gunoniggi; David siggi sorba bur bule anmar ibmar durdaggoed. Libro bíblico de Rut.