KE BIBLE, afo eyekụt n̄wed ẹkotde Ruth. Enye edi mbụk ubon oro okodude ke ini Israel ẹkenyenede mme ebiereikpe. Ruth edi n̄kaiferi idụt Moab; enye itoho idụt Israel Abasi. Edi ke Ruth ọfiọkde aban̄a Abasi akpanikọ, Jehovah, enye otịm edima enye. Naʹo·mi edi n̄wan ọsọn̄de akan emi akan̄wamde Ruth ekpep aban̄a Jehovah.

Naʹo·mi edi n̄wan Israel. Enye ye ebe esie ye nditọ iren iba ẹma ẹkedụn̄ ke idụt Moʹab ke ini udia akananade ke Israel. Do usen kiet, ebe Naʹo·mi akpa. Ekem nditọ iren Naʹo·mi ẹdọ nditọ iban Moʹab iba ẹkotde Ruth ye Orʹpah. Edi ke ebede n̄kpọ nte isua 10, nditọ Naʹo·mi iba ẹkpa. Naʹo·mi ye nditọ iban iba ẹmi ẹkefụhọ didie ntem! Nso ke Naʹo·mi edinam ke emi?

Usen kiet, Naʹo·mi ebiere ndinam anyan isan̄ mfiak mbịne ikọt esie. Ruth ye Orʹpah ẹyom nditie ye enye, ntre, mmọ ẹtiene ẹsan̄a. Edi ke mmọ ẹma ẹkesan̄a esisịt ke usụn̄, Naʹo·mi ọwọn̄ọde ọdọhọ nditọ iban oro ete: ‘Ẹfiak ẹnyọn̄ ẹketie ye eka mbufo.’

Naʹo·mi ọkọm nditọ iban oro unyọn̄. Ke oro, mmọ ẹtọn̄ọ nditua, koro mmọ ẹmade Naʹo·mi etieti. Mmọ ẹte: ‘Ih-ih! Nnyịn iyedi itiene ikọt fo.’ Edi Naʹo·mi ọbọrọ: ‘Ana mbufo ẹfiak ẹnyọn̄, nditọ mi. Eyefọn akan ọnọ mbufo ke ufọk.’ Ntre Orʹpah adaha ọnyọn̄. Edi Ruth inyọn̄ke.

Naʹo·mi ọwọn̄ọde ọdọhọ enye ete: ‘Orʹpah ọmọnyọn̄. Afo n̄ko tiene enye nyọn̄.’ Edi Ruth ọbọrọ: ‘Kudomo ndinam mi n̄kpọn̄ fi! Yak mi ntiene fi. Nyeka ebiet afo akade, nyedụn̄ ke ebiet afo odụn̄de. Ikọt fo eyedi ikọt mi, Abasi fo eyenyụn̄ edi Abasi mi. Nyekpa ke ebiet afo akpade, nyenyụn̄ mbụhọ do.’ Ke Ruth ọdọhọde ntem, Naʹo·mi idomoke aba ndinam enye ọnyọn̄.

Ke akpatre, iban iba ẹmi ẹsịm Israel. Mmọ ẹdụn̄ mi. Iwiwa, Ruth ọtọn̄ọ ndinam utom ke in̄wan̄, koro edi ini ukpen̄e barley. Eren emi ẹkotde Boaz ayak enye atan̄ barley ke in̄wan̄ esie. Nte ọmọfiọk owo emi eka Boaz ekedide? Ekedi Raʹhab obio Jerʹi·cho.

Usen kiet, Boaz asian Ruth: ‘Mmokop kpukpru mban̄a fi, ye nte afo ọkọfọnde ido ye Naʹo·mi. Mmọfiọk nte ọkọkpọn̄de usọ ye uka ye idụt fo ye nte ekedidụn̄de ye mbon emi afo mukọfiọkke. Jehovah osụk ọfọn ye afo!’

Ruth ọbọrọ ete: ‘Afo ọmọfọn ye ami akaha, ete. Enem mi nte afo etịn̄de eti ikọ ye ami.’ Boʹaz ama Ruth etieti, ndien ibịghike mmọ ẹdọ ndọ. Emi otịm enem Naʹo·mi didie! Edi esịt enem Naʹo·mi akan ke Ruth ye Boʹaz ẹnyenede akpa eyeneren mmọ, Oʹbed. Ekem Oʹbed akabade edi ete ete David, emi nnyịn idikpepde ekese iban̄a ke ukperedem.