OTÀN 51

Luti po Naomi Po

TO BIBLU mẹ owe de nọ yin yiylọdọ owe Luti tọn. E bẹ otàn whẹndo de tọn hẹn he nọgbẹ̀ to ojlẹ he mẹ Islaeli tindo whẹdatọ lẹ. Luti yin awhli de sọn otò Moabi tọn mẹ; e ma wá sọn akọta Jiwheyẹwhe tọn mẹ gba. Ṣigba, whenue Luti plọnnu dogbọn Jiwheyẹwhe nugbo lọ, Jehovah dali, e wá yiwanna ẹn taun. Naomi yin yọnnu mẹhomẹ de he gọalọna Luti nado plọnnu dogbọn Jehovah dali.

Islaelivi de wẹ Naomi yin. Ewọ po asu etọn po gọna visunnu yetọn awe lẹ yì otò Moabi tọn mẹ to whenue núdùdù ma tin sọmọ to Islaeli. E wá jọ to gbèdopo bọ asu Naomi tọn kú. To enẹgodo, visunnu Naomi tọn lẹ wlealọ hẹ Luti po Olpa po he yin awe to viyọnnu Moabi tọn lẹ mẹ. Ṣigba to nukọn mẹ, nudi owhe ao godo, visunnu Naomi tọn awe lẹ sọ kú. Pọ́n lehe Naomi po ovisi etọn awe lẹ po na ko blawu do sọ! Etẹwẹ Naomi na wà todin?

To gbèdopo, Naomi basi dide nado zingbejizọnlin gaa de lẹkọyi omẹ etọn lẹ dè. Luti po Olpa po ma jlo na jo e do, enẹ wẹ zọ́n bọ yé hodo e. Ṣigba whenuena yé ko zingbejizọnlin lọ na ojlẹ de, Naomi lẹhlan viyọnnu lọ lẹ bo dọmọ: ‘Mì lẹkọyi whégbè bo yì onọ̀ mìtọn lẹ dè.’

Naomi sọ donùnùgo na yé dọ, e yì whedenu. Yé sọ jẹ avivi ji, na yé yiwanna Naomi taun wutu. Yé dọmọ: ‘Lala! Míwlẹ na hodo we yì omẹ towe lẹ dè.’ Ṣigba Naomi gblọnna yé dọmọ: ‘Mì jaale bo lẹkọ, viyọnnu ṣie lẹ. E na pọnte na mì hugan eyin mì lẹkọyi owhé mìtọn lẹ gbè.’ Olpa sọ lẹkọ dedo whégbè nugbo. Ṣigba Luti ma wàmọ.

Naomi sọ lẹhlan ẹn bo dọmọ: ‘Olpa ko lẹkọ. Hiẹ lọsu dona lẹkọyi whé po e po.’ Ṣigba Luti gblọn dọmọ: ‘Ma hẹn mi po huhlọn po nado jo we do blo! Gbọ ma yì hẹ we. Fie hiẹ yì wẹ yẹnlọsu na yì, podọ fie a nọ wẹ yẹn na nọ. Omẹ towe lẹ na yin omẹ ṣie lẹ, podọ Jiwheyẹwhe towe na yin Jiwheyẹwhe ṣie. Fie hiẹ kú do wẹ yẹnlọsu na kú do, podọ finẹ wẹ yẹn nasọ yin didi do.’ Whenuena Luti ko dọ ehe godo, Naomi masọ hẹn ẹn po huhlọn po nado lẹkọyi whé ba.

To godo mẹ, yọnnu awe lọ lẹ jẹ Islaeli. Finẹ wẹ yé de nado nọ nọ̀. Tlolo wẹ Luti jẹ azọ́nwa ji to glemẹ, na ojlẹ enẹ mẹ wẹ likun balle tọn nọ yin bibẹpli. Dawe de he nọ yin Boazi na ẹn gbè nado nọ ṣinyan likun balle tọn lọ to ogle etọn mẹ. Be hiẹ yọ́n mẹhe yin onọ̀ Boazi tọn ya? Lahabi he nọ tòdaho Jẹliko tọn mẹ wẹ.

To gbèdopo, Boazi dọna Luti dọmọ: ‘Yẹn ko sè nudagbe susu gando gowe, podọ dagbe susu he hiẹ wà na Naomi. Yẹn yọnẹn dọ a jo otọ́ towe po onọ̀ towe po do to otò towe titi mẹ bosọ de nado wá nọ mẹhe hiẹ ma yọnẹn paali dai lẹ ṣẹnṣẹn. Na Jehovah ni wà dagbe na we!’

Luti sọ gblọn dọmọ: ‘Mẹdaho, hiẹ ko do homẹdagbe susu hia mi. Aliho he mẹ hiẹ dọhona mi te ko miọnhomẹna mi taun.’ Boazi yiwanna Luti taun, podọ e ma dẹn bọ yé sọ wlealọ. Pọ́n lehe homẹ Naomi tọn na ko hùn do sọ! Ṣigba, ayajẹ Naomi tọn sọ sudeji to whenue Luti po Boazi po ji visunnu yetọn tintan he nọ yin Obẹdi. Obẹdi wá lẹzun babadaho Davidi tọn, otàn mẹhe tọn mí na plọn to nukọn mẹ.

Owe Biblu tọn Luti.

Kanbiọ Oplọn Tọn Lẹ