TAQSIṬ TIS 51

Rut d Naɛumi

DEG Wedlis Iqedsen tella yiwet n tektabt yeţţusemman Rut. Teţmeslay-​ed ɣef yiwet n twacult i gɛacen di zzman ideg i ḥekkmen leqwaḍi ɣef Isṛayil. Rut d yiwet n tlemẓit n tmurt n Muwab; ur telli ara seg wat Isṛayil, agdud n Ṛebbi. Asmi i tessen Yahwa, Ṛebbi n tideţ, tuɣal tḥemmel-​it aṭas. D yiwet n temɣart, yeţţusemman Naɛumi i gɛawnen Rut aţ-​ţissin Yahwa.

Naɛumi ţ-​ţameṭṭut n wat Isṛayil. Tunag neţţat d wergaz-​is d sin warraw-​is ɣer tmurt n Muwab asmi i d-​yeɣli laẓ ɣef tmurt n Isṛayil. Dinna i gemmut wergaz-​is. Umbeɛd, zewǧen warraw-​is nutni d snat n tullas n Muwab, yeţţusemman Rut akk-​d Ɛurfa. Lameɛna asmi i ɛeddan wazal n ɛecṛa iseggasen, mmuten ula d arraw n Naɛumi. Acḥal i teḥzen Naɛumi neţţat d snat n teslatin-​is! Acu ara texdem tura Naɛumi?

Yiwen wass, Naɛumi teqsed aţ-​ţuɣal ɣer tmurt n imawlan-​is. Rut akk-​d Ɛurfa ur bɣint ara a ţ-​ǧǧent, dɣa ddant yid-​es. Lameɛna asmi i lḥant kra n lweqt, Naɛumi tezzi ɣer teslatin-​is, tenna-​yasent: ‘Uɣalemt a yessi s ixxamen n tyemmatin-​nkunt.’

Naɛumi tsellem ɣef teslatin-​is, tessuden-​itent. Dɣa ṭṭerḍqent d imeṭṭi axaṭer ḥemmlent aṭas Naɛumi. Nnant-​as: ‘Xaṭi! A neddu yid-​em ɣer wegdud-​im.’ Lameɛna Naɛumi terra-​yasent: ‘Uɣalemt kan a yessi. Axiṛ-​akunt aţ-​ţilimt deg wexxam n lehl-​nkunt.’ Ihi Ɛurfa tekker aţ-​ţuɣal s imawlan-​is, ma d Rut teggumma aţ-​ţṛuḥ.

Naɛumi tezzi ɣer Rut, tenna-​yas: ‘Aţţan tnuṭ-​im Ɛurfa teṭṭef abrid aţ-​ţuɣal ɣer wegdud-​is. Ṛuḥ aţ-​ţedduḍ yid-​es.’ Lameɛna Rut terra-​yas: ‘Ur iyi-​ḥerreṣ ara a kem-​ǧǧeɣ! Anef-​iyi ad dduɣ yid-​em. Anda teddiḍ ad dduɣ, anda tzedɣeḍ ad zedɣeɣ. Agdud-​im ad yuɣal d agdud-​iw, Ṛebbi-​inem ad yuɣal d Ṛebbi-​inu. Anda ara temmteḍ ara mmteɣ, dinna daɣen ara neṭleɣ.’ Mi tesla Naɛumi i wannect-​a, teḥbes aḥiwet deg-​s, teǧǧa-​ţ aţ-​ţeddu yid-​es.

Ɣer taggara, Rut d Naɛumi wwḍent ɣer tmurt n Isṛayil, zedɣent dinna. Rut ur tɛeṭṭel ara tṛuḥ aţ-​ţexdem di lexla, axaṭer tebda tmegra n temẓin. Yiwen wergaz yeţţusemman Buɛaz, yeǧǧa-​ţ aţ-​ţelqeḍ deg iger-​is. Teẓriḍ anta i d yemma-​s n Buɛaz? D Raḥab-​nni n temdint n Yariḥu.

Yiwen was, Buɛaz yenna i Rut: ‘Ḥkan-​iyi-​d kullec fell-​am, amek i telhiḍ ţ-​ţemɣart-​im Naɛumi. Ẓriɣ teǧǧiḍ baba-​m, yemma-​m ţ-​ţmurt anda i tluleḍ akken a d-​tṛuḥeḍ ɣer wegdud werǧin tessineḍ. A m-​d-​yerr Ṛebbi lxiṛ i txedmeḍ!’

Rut terra-​yas: ‘Teččuṛeḍ d lḥanna ɣur-​i a sidi. Tṣebbreḍ-​iyi s lehduṛ-​ik ḥlawen.’ Buɛaz iḥemmel ayendin Rut, ur iɛeṭṭel ara yezweǧ yid-​es. Acḥal i tefṛeḥ Naɛumi s wannect-​a! Lameɛna, sseɛd n Naɛumi yennerna akteṛ asmi i d-​sɛan mmi-​tsen amenzu yeţţusemman Ɛubid. Mbeɛd, Ɛubid yuɣal d jeddi-​s n Dawed iɣef ara d-​nemmeslay aṭas ɣer zdat.

Adlis n Rut.