THĨINĨ wa Biblia nĩũkuona ibuku rĩĩtagwo Ruth. Rĩna rũgano rwa famĩlĩ yatũũraga ihinda-inĩ rĩrĩa Aisiraeli maarĩ na atuithania a cira. Ruth aarĩ mũtumia mwĩthĩ kuuma bũrũri wa Moabi; Ĩndĩ we ndaarĩ ũmwe wa rũrĩrĩ rwa Ngai rwa Isiraeli. Rĩrĩa Ruthu amenyire ũhoro wa Ngai wa ma Jehova, akĩmwenda mũno makĩria. Naomi nĩ mũtumia mũniarangu na nĩwe waateithirie Ruth amenye Jehova.

Naomi nĩ mũtumia Mũisiraeli. Ena mũthuriwe na ariũ ao erĩ maathamĩire bũrũri wa Moabi ihinda-inĩ rĩmwe kwarĩ na ng’aragu thĩinĩ wa Isiraeli. Rĩu mũthenya ũmwe-rĩ, mũthuri wa Naomi agĩkua. Thutha-inĩ ariũ a Naomi makĩhikia airĩtu erĩ Amoabi meetagwo Ruthu na Oripa. No ĩndĩ thutha ta mĩaka 10 yathira-rĩ, ariũ acio erĩ a Naomi magĩkua. Kaĩ Naomi na airĩtu acio erĩ nĩmaanyitirũo nĩ kĩeha-ĩ! Rĩu-rĩ, Naomi egwĩka atĩa?

Mũthenya ũmwe Naomi nĩeciririe kũhũndũka mũciĩ kũrĩ andũ ao. Ruthu na Oripa meendaga gũtũũra nake, na magĩkĩmũrũmĩrĩra. Rĩrĩa maathire rũgendo gwa kahinda, Naomi akĩgarũrũkĩra airĩtu acio akĩmera atĩrĩ: ‘Wĩthiĩrei, mũndũ o mũndũ acoke nyũmba ya nyina.’

Naomi akĩmumunya airĩtu acio. Mona ũguo makĩambĩrĩria kũrĩra tondũ nĩmendete Naomi mũno makĩria. Magĩkĩmwĩra atĩrĩ: ‘Aca-ni! Nĩtũgũcokania nawe kwa andũ anyu.’ Nake Naomi agĩgĩcokia: ‘Wĩhũndũkĩrei aarĩ akwa. Mũciĩ kwanyu nĩkuo kũmwagĩrĩire.’ Oripa akĩĩhũndũkĩra. Ĩndĩ Ruthu ndaigana kũhũndũka.

Naomi akĩmũgarũrũkĩra akĩmwĩra atĩrĩ: ‘Oripa nĩahũndũka. Tondũ ũcio o nawe garũrũka wĩthiĩre ũmũrũmĩrĩre.’ Nake Ruthu agĩkĩmwĩra atĩrĩ: ‘Tiga kũningĩrĩria ngũtige! Tũgũthiĩ nawe. O kũrĩa ũgũthiĩ, nokuo niĩ o na niĩ ngathiĩ, na kũrĩa ũgatũũra nokuo niĩ o na niĩ ngatũũra. Nao andũ anyu o nao magatuĩka andũ aitũ, nake Ngai waku nowe ũgatuĩka Ngai wakwa, na kũrĩa ũgakuĩra nokuo niĩ na niĩ ngakuĩra, na nokuo ngathikwo.’ Rĩrĩa Ruth oigire ũguo-rĩ, Naomi agĩtiga gũcoka kũmwĩra ahũndũke.

Mũthia-inĩ atumia acio erĩ magĩgĩkinya Isiraeli. Magĩkĩambĩrĩria gũtũũra kuo. O narua Ruthu akĩambĩrĩria kũruta wĩra wa mũgũnda, tondũ kwarĩ ihinda rĩa kũgetha cairi. Mũndũ wetagwo Boazu akĩmwĩtĩkĩria onganie cairi mũgũnda wake. Ĩ hihi nĩ ũĩ nyina wa Boazu aarĩ ũ? Aarĩ Rahabu o ũrĩa wa itũũra rĩa Jeriko.

Mũthenya ũmwe Boazu akĩĩra Ruthu atĩrĩ: ‘Nĩ menyithĩtio ũhoro waku, na ũrĩa ũkoretwo ũrĩ mũtugi he Naomi. O na ũrĩa watiganire na thoguo o na nyũkwa o na bũrũri wanyu ũrĩa waciarĩirũo, ũgĩũka kũrĩ andũ ũtaamenyanĩte nao mbere ĩo. Jehova arogwĩka wega!’

Ruth agĩcokia atĩrĩ: ‘Nĩũhoreretie ngoro yakwa, na ũkanjarĩria ndeto njega cia tha.’ Boazu nĩendire Ruthu mũno makĩria, na gũtiahĩtũkire kahinda karaya matahikanĩtie. Na kaĩ Naomi nĩagĩkenire-ĩ! Naomi rĩu ningĩ o na agĩkena makĩria rĩrĩa Ruthu na Boazu maagĩire kaana kao ka mbere, getagwo Obedi. Thutha ũcio Obedi agĩtuĩka gukawe wa Daudi, ũrĩa tũkwĩruta ũhoro wake makĩria thutha-inĩ.