ပူ ၅၁
ရူၤသးဒီးနၤဧမံ အဂ့ၢ်
လံာ်တဘ့ၣ်လၢတၢ်ကိးအီၤလၢ ရူၤသးန့ၣ် နကထံၣ်ဘၣ်အီၤလၢလံာ်စီဆှံပူၤန့ၣ်လီၤ. လံာ်အံၤ မ့ၢ်ပူတယုၢ်လၢအဘၣ်ဃးဒီး ပှၤဟံၣ်ဖိဃီဖိတဒူၣ် လၢကီၢ်အံၣ်စရ့လးအပူၤ, ဖဲပှၤစံၣ်ညီၣ်ကွီၢ်တဖၣ် ပၢတၢ်အကတီၢ်န့ၣ်လီၤ. ရူၤသးန့ၣ် မ့ၢ်ဝဲပှၤမိၤအးမုၣ်ဖိတဂၤလီၤ. တဘၣ်ဃးဒီးယွၤအပှၤဂီၢ်မုၢ် ပှၤအံၣ်စရ့လးဖိဘၣ်. ဘၣ်ဆၣ် ရူၤသးန့ၣ် ဖဲအသ့ၣ်ညါထီၣ်ဝဲ ယွၤလၢအမ့ၢ်အတီယဟိဝၤအခါ အဲၣ်ဝဲဒၣ်ယဟိဝၤ ဒိၣ်မးန့ၣ်လီၤ. မ့မ့ၢ်နၤဧမံတခီ မ့ၢ်သးပှၢ်မုၣ်လၢ အတဲသ့ၣ်ညါမၤစၢၤရူးသး ယဟိဝၤအဂ့ၢ်န့ၣ်လီၤ.
နၤဧမံမ့ၢ် ပှၤအံၣ်စရ့လးမုၣ်တဂၤလီၤ. အဝဲ, အဝၤ ဒီးအဖိခွါခံဂၤန့ၣ် သုးအလီၢ်ဆူကီၢ်မိၤအး ဖဲတၢ်အီၣ်တၢ်အီကၤ လၢကီၢ်အံၣ်စရ့လးပူၤ အကတီၢ်အခါန့ၣ်လီၤ. ဘၣ်မုၢ်တနံၤန့ၣ် နၤဧမံအဝၤသံဝဲဒၣ်လီၤ. လၢခံ နၤဧမံအဖိခွါခံဂၤန့ၣ် န့ၢ်အမါလၢပှၤမိၤအးမုၣ်ခံဂၤ လၢအမံၤမ့ၢ်ဝဲ ရူးသးဒီးဧိးရပၤန့ၣ်လီၤ. ဘၣ်ဆၣ်သနာ်က့ တုၤမ့ၢ်အယံာ် အနံၣ် ၁၀ အခါ အဖိခွါခံဂၤသံဝဲဒၣ်လီၤ. နၤဧမံဒီးပိာ်မုၣ်ဖိခံဂၤ ကသးအုးဝဲသ့ၣ်ဆံးဒိၣ်မးလဲၣ်န့ၣ်လီၤ. ခဲအံၤ, နၤဧမံကမၤတၢ်မနုၤလဲၣ်.
ဘၣ်မုၢ်တနံၤန့ၣ် နၤဧမံပာ်လီၤအသးလၢ ကက့ၤကဒါက့ၤဆူ အလီၢ်အိၣ်လီၢ်ဆိးဒီးအပှၤကလုာ်ဒၣ်ဝဲအအိၣ်, တၢ်ဒ့ၣ်စၢၤလၢအယံၤန့ၣ်လီၤ. ရူးသးဒီးဧိၤရပၤစ့ၢ်ကီး အဲၣ်ဒိးအိၣ်ဝဲသ့ၣ်ဒီး နၤဧမံဒ်သိးသိးအဃိ လဲၤပိာ်နၤဧမံအခံန့ၣ်လီၤ. ဘၣ်ဆၣ်, ဖဲအလဲၤတုၤ တၢ်လီၤတတီၤလဲၤအခါ နၤဧမံဃၣ်အသးဆူ ပိာ်မုၣ်ဖိတဖၣ်အအိၣ်ဒီးစံးဝဲ, ‘ဖိမုၣ်သ့ၣ်ဧၢ, က့ၤဆူသုဟံၣ်ဒီး က့ၤအိၣ်လၢသုမိၢ်တက့ၢ်’ န့ၣ်လီၤ.
နၤဧမံနၢမူ ပိာ်မုၣ်သးစၢ်ခံဂၤ ဒ်သိးအကဟးဖးဒီး အဝဲသ့ၣ်န့ၣ်လီၤ. ထဲန့ၣ်ဒီး သးစၢ်မုၣ်ခံဂၤလၢာ် ဟီၣ်ဝဲသ့ၣ်န့ၣ်လီၤ. အဂ့ၢ်ဒ်အံၤ အဝဲသ့ၣ်အဲၣ်နၤဧမံဒိၣ်မးန့ၣ်လီၤ. စံးဝဲသ့ၣ်လၢ, ‘ပတက့ၤဘၣ်. ပကလဲၤဒီးနၤဆူနပှၤကလုာ်အအိၣ်’ န့ၣ်လီၤ. နၤဧမံစံးဝဲလၢ, ‘ဖိမုၣ်သ့ၣ်ဧၢ, က့ၤဒီးသုကဘၣ်က့ၤလီၤ. သုမ့ၢ်က့ၤအိၣ်လၢ သုဟံၣ်န့ၣ် ကဂ့ၤဒိၣ်တက့ၢ်လီၤ.’ ထဲန့ၣ်ဒီး ဧိၤရပၤက့ၤကဒါက့ၤဝဲဆူအဟံၣ်န့ၣ်လီၤ. ဘၣ်ဆၣ် မ့မ့ၢ်ရူၤသးတခီတက့ၤဝဲဘၣ်.
နၤဧမံဃၣ်တရံးအသးဒီးစံးဝဲဒၣ် ‘ဧိၤရပၤက့ၤကဒါက့ၤလံ. နၤစ့ၢ်ကီးက့ၤပိာ်အခံ ဒီးက့ၤဆူနဟံၣ်ဘီၣ်ဖိမုၣ်ဧၢ.’ ဘၣ်ဆၣ်သနာ်က့ ရူးသးစံးဝဲ ‘ဂုာ်ကျဲးစၢးလၢ ယကလဲၤသဒၣ်နၤတဂ့ၤဧီၢ် မိမိၢ်ဧၢ, ပျဲယကလဲၤဃုာ်တၢ်ဒီးမိမိၤတက့ၢ်. ဖဲမိမိၢ်လဲၤတပူၤလၢ်လၢ်န့ၣ် ဖိမုၣ်ကလဲၤလီၤ. ဖဲမိမိၢ်အိၣ်ဝဲအလီၢ်န့ၣ် ဖိမုၣ်ကအိၣ်လီၤ. မိမိၢ်အပှၤကလုာ်န့ၣ် မ့ၢ်ဖိမုၣ်အပှၤကလုာ်, မိမိၢ်အယွၤစ့ၢ်ကီး မ့ၢ်ဖိမုၣ်အယွၤ, ဖဲမိမိၢ်သံအလီၤန့ၣ် ဖိမုၣ်စ့ၢ်ကီး မ်အကဘၣ်တၢ်ဘျၢလီၤအီၤတက့ၢ်’ န့ၣ်လီၤ. ရူၤသးစံးဝဲဒ်အံၤအဃိ နၤဧမံတတဲဆူၣ်အီၤလၢ ကက့ၤကဒါက့ၤဆူအဟံၣ်လၢၤဘၣ်.
ထဲန့ၣ်ဒီးပိာ်မုၣ်ခံဂၤ ဟဲတုၤဝဲလၢ ကီၢ်အံၣ်စရ့လးန့ၣ်လီၤ. အိၣ်ဂၢၢ်အိၣ်ကျၢၤဝဲဖဲ တၢ်လီၢ်အဝဲန့ၣ်လီၤ. ဘၣ်ဆၢကတီၢ်လၢ တၢ်ကူးဖှိၣ်ဘုမုယီၤအကတီၢ်အဃိ ရူၤသးန့ၣ် လဲၤလီၤမၤတၢ်မၤလၢ စံာ်ပျီပူၤတဘျီဃီန့ၣ်လီၤ. ပှၤတဂၤလၢအမံၤမ့ၢ် ဘိၤဧးန့ၣ် ဟ့ၣ်ဝဲအခွဲးလၢ ရူၤသးကထၢဖှိၣ်တၢ်လၢ အစံာ်ပျီပူၤန့ၣ်လီၤ. ဘိၤဧးအမိၢ်န့ၣ်မ့ၢ်မတၤလဲၣ်န့ၣ် သုသ့ၣ်ညါဧါ. မ့ၢ်ဒၣ် ပှၤဝ့ၢ်ယရံၤဃိမုၣ် ရၤဃးန့ၣ်လီၤ.
ဘၣ်မုၢ်တနံၤ ဘိၤဧးစံးအီၤလၢ ‘နဂ့ၢ်န့ၣ် ယနၢ်ဟူတ့ၢ်ဝံၤလံ. လၢနၤဧမံအဖီခိၣ်န့ၣ် နသူၣ်ဂ့ၤသးဝါဆံးဒိၣ်လဲၣ်န့ၣ်စ့ၢ်ကီး ယသ့ၣ်ညါတ့ၢ်လံလီၤ. ယနၢ်ဟူတ့ၢ်လၢ နစူးကွံာ်, ညိကွံာ် နမိၢ်နပၢ်, နထံနကီၢ်ဝံၤ ပှၤတကလုာ်လၢနတသ့ၣ်ညါဘၣ် နီတဘျီအကျါန့ၣ် နဟဲအိၣ်ဟဲဆိးလံလီၤ. မ်ယဟိဝၤကပာ် အတၢ်သူၣ်ဂ့ၤသးဝါ လၢနဖီခိၣ်န့ၣ်တက့ၢ်’ န့ၣ်လီၤ.
ရူၤသးစံးဆၢဝဲ, ‘ကစၢ်ဧၢ, နသးဂ့ၤဒိၣ်မးလၢ ယလိၤန့ၣ်လီၤ. မ့ၢ်လၢနကတိၤတၢ်ဒီးယၤအံၤ အိၣ်ဒီးတၢ်သူၣ်ကညီၤသးကညီၤ ဒ်အံၤအဃိ ယသူၣ်အံၤခုၣ်ယသးအံၤမုာ်ဝဲဒိၣ်မးန့ၣ်လီၤ.’ ဘိၤဧးန့ၣ် အဲၣ်ဝဲရူၤသးဒိၣ်မးန့ၣ်အဃိ တယံာ်ဘၣ်ဒီး အဝဲသ့ၣ် ဒိးတ့ဒိးဖျီအသးန့ၣ်လီၤ. နၤဧမံအသးခုဒိၣ်မးန့ၣ်လီၤ. ဖဲရူးသးဒီးဘိၤဧး မၤန့ၢ်ဝဲဖိဝဲၢ်ကိ ဧိၤဘ့းအခါနၤဧမံ သးခုဝဲဒိၣ်မးန့ၣ်လီၤ. လၢခံဧိၤဘ့းန့ၣ် ကဲထီၣ်ဝဲ ဒၤဝံးအဖုဖးဒိၣ်န့ၣ်လီၤ. ပကသ့ၣ်ညါဘၣ် ဒၤဝံးအဂ့ၢ်လၢခံ အါမးန့ၣ်လီၤ.
လံာ် ရူၤသး.
