MOBIBELI mwa kara buke zimwe zedina Rutu. Azo kuna kara esimwititi lyokuhamena epata eli lya parukire posiruwo esi Israeli za kere novapanguli. Rutu mukadona gomosirongo saMowaba; age kapi ga hamena komuhoko gwaKarunga Israeli. Nye Rutu apa ana lirongo kuhamena Karunga gosili Jehova, ta mu hara unene. Naomi mukadi gomukondi ogu ga vaterere Rutu mokulironga kuhamena Jehova.

Naomi mukadi goMuisraeli. Age namugara gwendi ntani novena vawo wovagara vavali kwa dirukilire kosirongo saMowaba posiruwo esi moIsraeli mwa kere nondya dononsesu dokulya. Makura ezuva limwe mugara gwaNaomi ta fu. Konyima vana vaNaomi wovagara tava kwara vakadona vavali woVamowaba womadina Rutu naOrupa. Nye konyima zonomvhura ngwendi 10, vana vaNaomi vavali wovagara tava fu. Ee, ngapi tupu omu va guvire oNaomi novakadona vavali ava! Yisinke nye na rugana Naomi ngesi?

Ezuva limwe Naomi ta tokora a ze morugendo rorure rokutengura kekoro lyendi. Rutu naOrupa vana hara kukara nage, makura tava zi nage. Nye konyima zokugenda sinano songandi monzira, Naomi ta pirukire vakadona nokutanta asi: ‘Tengureni kweni, mu ka kare nozinyeni.’

Naomi makura ta ncumita vakadona nokuvarekera. Awo makura tava tameke kulira morwa awo kwa hara sili Naomi. Tava tanta asi: ‘Hawe! Nose tatu zi noge kombunga zoge.’ Nye Naomi ta limburura asi: ‘Tengureni, vana vange. Hansa nsene mu kara kembo lyeni.’ Orupa makura ta tengura kembo. Nye Rutu kapi ana kutengura.

Naomi makura ta mu tantere asi: ‘Orupa ana tengura. Nove ka ze nendi kembo.’ Nye Rutu ta limburura asi: ‘Wa ha tantera nge asi ni ku sige! Siga nge ni ze noge. Nkenye oku ngo za, name yiko; ndi koku ngo ka kara, name yiko. Mbunga zoge, name zange ngazi kara, ano Karunga goge, name Karunga gwange nga kara. Oku ngo ka fira, name yiko ngani ka fira, ako yiko ngava ka vhumbika nge.’ Apa ana tanta Rutu eyi, Naomi kapi hena ana kumuninka asi a tengure.

Mouhura vakadi vavali ava tava ya siki moIsraeli. Omu makura tava ya tungu. Rutu makura poopo ta tameke kurugana mepya, morwa aso kwa kere siruwo sokuteza nombuto. Mugara gedina Bowasa ta mu sigi a teze nombuto mepya lyendi. Ono diva asi wolye ozina vaBowasa? Awo kwa kere Rahabu gomositata saJeliko.

Ezuva limwe Bowasa ta tantere Rutu asi: ‘Ame kwa sansekera nge nayinye yokukuhamena ntani omu wa pakera Naomi mbili. Ame na diva asi ove kwa siga oguho nonyoko nosirongo seni, o wize o ya tunge novantu ava wa dira kudiva nare nampili nakauke. Jehova ngano a kare nawa nove!’

Rutu ta limburura asi: ‘Munekuto, ove ono fire nge nkenda unene. Ono pe nge mukumo pokuuyunga nonkango dokutendeka nge.’ Bowasa ta hara Rutu unene, ano kapi pwa pita siruwo sosire unene makura tava likwara. Ee, ngapi tupu eyi omu yina hafesa Naomi! Nye Naomi ta hafa hena unene kupitakanena apa Rutu naBowasa vana gwana munwawo gokuhova gomugara, gedina Obedi. Konyima Obedi ta ka kara ozinakuru vaNdafita, ogu ngatu lironga yoyinzi konyima.

Buke zoBibeli zaRutu.