Chihande 51

Lute naNowemi

MUMBIMBILIYA mwatwama mukanda waLute. Wapwa mujimbu watanga yapwileko hamakumbi avaka-kuyula muIsalele. Lute himwanapwevo wakulifuchi lyaMowave; kapwa wakumuyachi waKalunga waIsaleleko. Oloze hakulinangula vyaKalunga wamuchano, Yehova, aputukile kumuzanga chikuma. Nowemi himukulwane wapwevo uze akafwile Lute alinangule vyaYehova.

Nowemi hipwevo wakaIsalele. Ikiye nalunga lyenyi navana vavo vavali vayile kuMowave omu muIsalele mwapwile kulya chachindende. Jino lunga lyaNowemi afwile. Kaha vana vaNowemi vambachile mapwevo vakuli vaMowave, majina avo vakivo vaLute naOlopa. Oloze omu hahichile kafwe myaka 10, vana vavali vaNowemi vafwile. Ocho kulinyenga kana valinyengele vaNowemi navava vanavamapwevo vavali! Nowemi mwalinga ngachilihi jino?

Likumbi limwe Nowemi hikukasa ungeji wausuku wakuya kwimbo kuli vausoko wenyi. Lute naOlopa navasaka vatwamenga nenyi, ngocho hinavaya nenyi hamwe. Oloze hakutambuka katunda, Nowemi mwamba kulyava vanavamapwevo ngwenyi: ‘Kindulukenu kwimbo mukatwame namanenu.’

Nowemi mwavasweswenya ava vana vamapwevo nakuvasalisa. Kaha vakivo hikushikwoka, mwomwo vamuzanga chikuma Nowemi. Ngwavo: ‘Nduma! Natuya nove kuvausoko wove.’ Oloze Nowemi ngwenyi: ‘Yenunga kwenu, vana vami. Chamwaza kutwama kwimbo.’ Olopa himwakinduluka kwimbo. Oloze Lute chiku.

Nowemi ngwenyi: ‘Olopa nayi. Nove yako hamwe nenyi kwimbo.’ Oloze Lute ngwenyi: ‘Kanda namungushinjila kumisezako! Ngwechenu nguyenga nenu. Kuze namuya, nanguyako, kuze namutwamanga kukiko nangutwamanga. Vatu jenu navakapwanga vatu jami, kaha Kalunga kenu mwapwanga Kalunga kami. Kuze naukafwila, kukiko nangukafwila, nakungufunjila.’ Omu Lute nahanjika ngocho, Nowemi hikulitwamina kumushinjila akinduluke kwimbo.

Jino mapwevo vavali ava washa muIsalele. Kuno hikutunga nakutwama. Lute hoho vene naputuka nakuzata muwande, mwomwo hingonde yakwaha mbale. Lunga walijina lyaMbowaze mwamwecha anonojole mbale muwande wenyi. Unamwijiva apwile naye yaMbowaze tahi? Apwile Lahave wamunganda yaYeliko.

Likumbi limwe Mbowaze mwamba kuli Lute ngwenyi: ‘Mujimbu wove ngunawivu, nomu unalingi mwalikoji kuli Nowemi. Ngunevu nomu unaseze iso nanoko nalifuchi wasemukilile nomu uneza nakutwama navatu wazenekelenga kutachikiza. Yehova akukisule!’

Lute ngwenyi: ‘Mwata, unahanjika mwalikoji kuli ami. Unanguvendejeka hakuhanjika mwamwaza kuli ami.’ Mbowaze kumutala Lute kumuchima to, kaha nakushimbula chiku hikulimbata. Ocho kuwaha kana evwile Nowemi! Nowemi awahililile chikuma omu Lute naMbowaze vakwachile mwana walunga, walijina lyaOvete. Jino Ovete hikupwa kaka yaNdavichi, uze natulinangula chikuma kulutwe.

Mukanda waMbimbiliya waLute.