NU̱Ú Biblia ndaniʼún iin libro ña̱ naní Rut. Ña̱yóʼo nátúʼun xa̱ʼa ña̱ ndo̱ʼo iin ta̱a xíʼin ñá síʼíra xíʼin se̱ʼena, na̱yóʼo ni̱xi̱yona tiempo tá ni̱xi̱yo na̱ juez ñuu Israel. Ñá Rut ñá ñuu Moab xi̱kuuñá, su̱ví ñá ñuu Ndióxi̱ níxikuuñá. Soo ñá Rut tá na̱kunda̱a̱-iniñá xa̱ʼa Ndióxi̱ míí ta̱ nda̱a̱, Jehová, xi̱kuni̱níñára. Ñá nána Noemí kúúñá sa̱náʼa̱ ñá Rut xa̱ʼa Jehová.

Ñá Noemí ñá ñuu Israel kúúñá. Miíñá xíʼin yiíñá xíʼin u̱vi̱ ta̱a se̱ʼena ku̱a̱ʼa̱nna koona ñuu Moab chi kǒo ña̱ʼa kuxuna ñuu Israel. Soo iin ki̱vi̱ ni̱xi̱ʼi̱va yiíñá. Tándi̱ʼi, ti̱ndaʼa̱ u̱vi̱ saá se̱ʼeñá xíʼin u̱vi̱ ná si̱ʼí ná ñuu Moab, iinñá naní Rut ta inkañá naní Orpa. Tá ni̱ya̱ʼa 10 ku̱i̱ya̱ ni̱xi̱ʼi̱va u̱vi̱ saá ta̱a se̱ʼe ñá Noemí. Ni̱kusuchíkaví-iniñá. ¿Ndáaña keʼéñá vitin?

Iin ki̱vi̱, ñá Noemí kúni̱ñá ndikóñá nu̱ú ndóo na̱ táʼanñá, soo káni̱ní ndóona. Ñá Rut xíʼin ñá Orpa kúni̱ná ku̱ʼu̱nná xíʼin ñá Noemí. Soo tá ku̱a̱ʼa̱nná yichi̱, ñá Noemí káʼa̱nñá xíʼinná: ʼNdikóndó ñuundó nu̱ú ndóo na̱ veʼendóʼ.

Ñá Noemí ni̱nda̱yíñá náyóʼo. Ta ki̱xaʼá xákuná, chi kúni̱níná xíniná ñá Noemí. Ta ni̱ka̱ʼa̱nná: ʼNdi̱ʼi̱ kúni̱ndi̱ ku̱ʼu̱nndi̱ xíʼún ñuún nu̱ú ndóo na̱ táʼúnʼ. Soo ñá Noemí káchiñá xíʼinná: ʼXíniñúʼu ndikóndó ñuundó. Va̱ʼakava kundoondó kán xíʼin na̱ veʼendóʼ. Ta ñá Orpa ndi̱kóvañá ñuuñá. Ta ñá Rut kǒo níxiinñá ndikóñá.

Ñá Noemí ni̱ka̱ʼa̱nñá xíʼin ñá Rut: ʼÑá Orpa ndi̱kóñá ñuuñá, kuaʼán xíʼinñáʼ. Soo ñá Rut nda̱kuiinñá: ʼKǒo ka̱ʼún ña̱yóʼo xíʼin ña̱ sandakoi̱ yóʼó, taxi ná ku̱ʼi̱n xíʼún. Ndáaka nu̱ú ku̱ʼún, ku̱ʼi̱n xíʼún, ta nu̱ú koún, kán koi̱ xíʼún. Ta ñuún koo ñui̱, ta Ndióxi̱ún koo Ndióxi̱i̱. Ñuu nu̱ú kuviún, kán kuvii̱ ta kán sandúxu̱nna yi̱ʼi̱ʼ. Tá ni̱ka̱ʼa̱n ñá Rut ña̱yóʼo, ñá Noemí kǒo níka̱ʼa̱nkañá xíʼin ñá Rut ña̱ ndikóñá chí ñuuñá.

Nda̱a̱ vitinví ni̱xa̱a̱ ñá Noemí xíʼin ñá Rut ñuu Israel, ta kán xi̱kundooná. Ñá Rut ki̱xaʼáñá káchíñuñá chiñu yuku̱, chi tiempo sákeena kúúña saá. Iin ta̱ naní Boaz ta̱xira ndakaya sákañá ña̱ʼa nu̱ú ñuʼúra. ¿Á xíni̱ún ndáañá xi̱kuu siʼí ta̱ Boaz? Ñá Rahab xi̱kuuñá, ñá ni̱xi̱yo ñuu Jericó.

Iin ki̱vi̱ ta̱ Boaz ni̱ka̱ʼa̱nra xíʼin ñá Rut: ʼKu̱a̱ʼána káʼa̱n xa̱ʼún, ña̱ viíní íyo iniún xíʼin ñá Noemí. Xa̱ku̱nda̱a̱-inii̱ ña̱ nda̱koún na̱ veʼún xíʼin ñuún ta va̱xiún koún iin ñuu nu̱ú kǒo xíni̱ún. Jehová ná taxi ña̱ va̱ʼa ndaʼúnʼ.

Ñá Rut nda̱kuiinñá: ʼVa̱ʼaní ta̱a kúún xíʼi̱n, táta. Kúsi̱íní-inii̱ xíʼin tu̱ʼun ña̱ káʼún xíʼi̱nʼ. Ta̱ Boaz kútóora xínira ñá Rut, ta ni̱ya̱ʼa loʼo tiempo ta ti̱ndaʼa̱vana. Ta ñá Noemí kúsi̱íkaví-iniñá. Soo ndeéka ni̱kusi̱í-iniñá tá ka̱ku se̱ʼe nu̱ú ñá Rut xíʼin ta̱ Boaz, ta̱ loʼo yóʼo chi̱núuna ki̱vi̱ra Obed. Tándi̱ʼi ta̱ Obed yóʼo ni̱xa̱a̱ra ku̱ura xi̱í ta̱ David. Chí nu̱únínu loʼoka sakuaʼakayó xa̱ʼa ta̱ David.