MOMBIMBELI ngoye oto ka mona mo embo lyedhina Rut. Olyo ehokololo kombinga yuukwanegumbo mboka wa kala nomwenyo pethimbo ndyono Israel sha li shi na aatokolihapu. Rut oye omukiintu omugundjuka gwomoshilongo shaMoab; ye ke shi gumwe gwomoshigwana shaKalunga Israel. Ihe sho Rut i ilongo kombinga yaKalunga kashili Jehova, ye okwa tameke okukala e mu hole unene. Naemi oye omukiintu omukuluntu ngoka a kwatha Rut oku mu longa kombinga yaKalunga.

Naemi oye Omwiisrael. Ye nomusamane gwe noyanamati yaali oya tembukile koshilongo shaMoab sho muIsrael mwa li iikulya iishona. Esiku limwe omulumentu gwaNaemi okwa si. Konima oyanamati yaNaemi oya hokana naakadhona yaali Aamoab yomadhina Rut naOrpa. Ihe konima yoomvula 10 lwaampono oyanamati yaali yaNaemi oya si. Alikana Naemi naakiintu aagundjuka yaali oya li ya sa oluhodhi ngiini! Nga-shingeyi Naemi ota ka ninga nee ngiini?

Esiku limwe Naemi ota tokola a kuthe olweendo olule okushuna koshigwana she. Rut naOrpa oya hala ya kale puye, notaa yi ano pamwe naye. Ihe sho ye ende ethimbo ele, Naemi ota ti kaakiintu aagundjuka: ‘Shuneni kegumbo nomu ye mu ka kale poonyoko.’

Naemi ote ya laleke nethipo lyokomilungu. Opo nduno otaa tameke taa lili, oshoka yo oye hole Naemi unene. Yo otaa ti: ‘Aawe! Tse otatu yi pamwe nangoye koshigwana shoye.’ Ihe Naemi ota yamukula: ‘Ne omu na okushuna, aamwandje. Otashi ka kala shi li nawa kune okukala kegumbo.’ Ano Orpa ota shuna. Ihe Rut ita shuna.

Naemi ota ti ngashingeyi kuye: ‘Orpa okwa shuna. Shuna pamwe naye kegumbo.’ Ihe Rut ota yamukula: ‘Ino kambadhala u yithe ndje! Etha ndje ndi ye pamwe nangoye. Hoka to yi, ngame oko tandi ka ya naampoka to kala, ngame opo tandi kala. Oshigwana shoye otashi ka kala oshigwana shandje, Kalunga koye oye ta ka kala Kalunga kandje. Mpoka to sile, ngame opo tandi ka sila, nopo mpoka ngame tandi ka fumvikwa.’ Sho Rut e shi ti, Naemi ota mwena oku mu thiminika a shune kegumbo.

Lwahugunina aakiintu yaali mbaka otaa thiki muIsrael. Yo otaa tula moka. Rut ota tameke mbalambala okulonga mepya, oshoka olyo ethimbo lyokuteya iilya. Omulumentu gwedhina Boas ote mu toolitha iilya ye mepya. Owa tseya mbela kutya olye a li yina yaBoas? Okwa li Rahab gwokoshilando shaJeriko.

Esiku limwe Boas ota ti kuRut: ‘Konyala ngame ondu uva ayihe kombinga yoye, nonkene u li nawa naNaemi. Ngame onda tseya nkene ngoye wa thigi po ho nanyoko noshilongo shoye nonkene ngoye we ya okukala mokati koshigwana shoka ngoye inoo shi tseya. Jehova ne ku yambeke!’

Rut ota yamukula: ‘Ngoye owa kala nangame nombili, tatekulu. Ngoye ou uvitha ndje nawa molwashoka owa popi nangame nawa ngawo.’ Boas oku hole unene Rut, nokonima yokathimbo ye ota hokana naye. Alikana Naemi okwa nyanyukwa ngiini kwaashino! Ihe nokuli Naemi okwa nyanyukwa unene sho Rut naBoas ya mono okanona kawo kotango okamati, kedhina Obed. Konima Obed ota ningi hekulu yaDavid, ngono tse natango tatu ki ilonga nale oshindji kombinga ye.