51 yachachiy

Rutwan Noemiwan

BIBLIAPI Rut sutiyuq librota tarinki. Kayqa Israelta juezkuna kamachichkaptinku juk familiamanta willakun. Rutqa juk sipas Moab llaqtamanta karqa, mana israelitachu karqa. Chaywanpis chiqa Diosmanta yachakuspaqa, Jehová Diosninchikta mayta munakurqa. Noemiqa paya warmiña kaspa, Rutta Jehová Diosta riqsinanpaq yanaparqa.

Noemiqa israelita karqa. Payqa qusanwan, iskay churisninwan ima, Israelpi mikhuna pisiyasqanrayku Moab jallpʼaman ripurqanku. Noemip qusan wañupurqa. Chaymanta iskaynin churisninqa moabitaswan casarakurqanku, paykuna Rut, Orfa ima sutichakurqanku. Chunka wataman kay iskay churisnin wañupullarqankutaq. ¡Phutikunapaq ichari! ¿Imatataq Noemí ruwarqari?

Juk pʼunchay Noemí llaqtayman kutipusaq nirqa, chaypaqqa may karuta purinan karqa. Rut, Orfa ima, paywan kayta munaspa, khuska ripurqanku. Ñanpi kachkaspa, Noemí sipaskunata nirqa: ‘Wasiykichikman kutipuychik wawasniy, mamasniykichikwan qhipakuychik’, nispa.

Noemí ñuqchʼasninta muchʼaykuspa kachapurqa. Paykunaqa, Noemita mayta munakusqankurayku waqaspa nirqanku: ‘¡Mana! Ñuqayku qamwan llaqtaykiman ripuyta munayku’, nispa. Noemitaq nirqa: ‘Qamkunaqa kutinaykichik tiyan, wawasniy. Llaqtaykichikpi astawan allin risunqachik’, nispa. Jinamanta Orfa llaqtanman kutipun. Ruttaq qhipakun.

Noemí Rutman nirqa: ‘Orfa llaqtanman ripunña. Qampis paywan ripullaytaq’, nispa. Ruttaq kutichin: ‘¡Ama saqisunayta mañawaychu! Qamwan riqta saqillaway. Maymanchá rinki, chayman risaq, maypicha kawsamunki, chaypi kawsasaq. Llaqtaykiqa llaqtay kanqa, Diosniykipis Diosnillaytaq kanqa. Maypichá wañunki, chayllapitaq wañusaq, chaypitaq pʼampawanqanku’, nispa. Chayta uyarispa Noemiqa manaña kutipunanpaq imatapis nirqachu.

Kay iskay warmisqa Israelman chayarqanku. Chaypitaq qhipakurqanku. Rutqa cebada rutuna tiempo kasqanrayku campopi llamkʼayta qallarirqa. Juk runa Booz sutiyuq cebadata rutuchichkarqa. ¿Pichus Boozpa maman kasqanta yachankichu? Jericomanta Rahab karqa.

Juk pʼunchay Booz Rutta nirqa: ‘Qusayki wañupusqanmantapacha Noemipaq ruwasqaykita allinta yachani. Chantá mana riqsisqayki llaqtaman tiyakuq jamunaykipaq, tatasniykita, llaqtaykitapis saqisqaykita yachallanitaq. ¡Jehová tʼinkasuchun kay ruwasqaykimanta!’, nispa.

Ruttaq kutichirqa: ‘Ancha khuyakuyniyuq ñuqapaq kanki, parlawasqaykitaq astawan kallpachawan’, nispa. Booz Rutta munakurqa, tumpamantawantaq paywan casarakurqa. ¡Kayqa mayta Noemita kusichirqa! Noemiqa astawanraq kusikun kuraq allchhisitunta rikuspa, juknin allchhisitunqa Obed sutikun. Davidqa Obedpa allchhin karqa. Qhipaman Davidmanta astawan yacharisunchik.

Bibliamanta Rut libro.