M’BIBILYA munadzagumana bukhu inacemerwa Rute. Ndi mbiri ya banja inango idakhalapo m’nzidzi ukakhala Israyeli na atongi amiseru. Rute akhali ntsikana wa dziko ya Moabi; iye nee akhali wa dziko ya Mulungu, Israyeli. Mbwenye mudapfunza Rute pya Mulungu wandimomwene, Yahova, iye adzamfuna kakamwe. Naomi ndi nkazi wakukalamba adaphedza Rute kupfunza pya Yahova.

Naomi ndi nkazi wa m’Israyeli. Iye na mamunace na anace awiri amuna afulukira ku dziko ya Moabi m’nzidzi ukhali Israyeli na pyakudya pyakucepa. Ntsiku inango mamuna wa Naomi alowa. M’kupita kwa nzidzi ana amuna a Naomi akwatira atsikana awiri Akumoabi anacemerwa Rute na Oripa. Mbwenye pakupita piaka 10, ana awiri amuna a Naomi alowa. Akhala akutsukwala tani Naomi na atsikana awiri ale! Kodi Naomi mbadadzacitanji mphapo?

Ntsiku inango Naomi atonga kucita ulendo wakulapha wakubwerera kwa mbumba yace. Rute na Oripa akhafuna kukhala na iye, natenepa iwo aenda pabodzi na iye. Mbwenye mukhadafamba iwo nsinzo wakucepa m’nseu, Naomi azungunuka kwa atsikana mbalonga: ‘Bwererani kwanu mukakhale na amama anu.’

Naomi ampswompswona atsikana m’kupanganizana. Thangwi ya pyenepi iwo atoma kulira, thangwi akhafuna kakamwe Naomi. Iwo alonga: ‘Nkhabe! Ife tinaenda na imwe kwa mbumba yanu.’ Mbwenye Naomi atawira: ‘Musafunika kubwerera, ana anga. Pinadzakhala mwadidi muli kwanu.’ Natenepa Oripa atoma kuenda kunyumba kwawo. Mbwenye Rute hadaenda tayu.

Naomi azungunuka kwa iye mbampanga: ‘Oripa aenda. Iwe ndokombo naye kunyumba.’ Mbwenye Rute atawira: ‘Lekani kuyesera kundicitisa kukusiyani! Ndisiyeni ndiende na imwe. Kunendemwe ndinadzaendambo, kunakhalemwe ndinadzakhalambo. Mbumba yanu inadzakhala mbumba yanga, na Mulungu wanu anadzakhala Mulungu wanga. Kunafemwe ndinadzafambo, ndinadzaikhwa kweneku.’ Mudalonga Rute pyenepi, Naomi nee ayesera pontho kuncitisa kubwerera kunyumba.

Pakumalisira akazi awiri anewa afika ku Israyeli. Kweneku iwo akhalika. M’nzidzi uneule ene Rute atoma kuphata basa m’minda, thangwi ukhali nzidzi wa kubvuna macewere. Mamuna wakucemerwa Bowazi antawirisa kubvuna macewere m’minda yace. Kodi musadziwa kuti mama wa Bowazi akhali ani? Akhali Rahabi wa m’nzinda wa Yeriko.

Ntsiku inango Bowazi apanga Rute: ‘Ndabva pyonsene pya iwe, na kukhala kwako wadidi kwa Naomi. Ndisadziwa masiyiro ako baba na mako na dziko ene yakwanu na kubwera kwako kudzakhala nkati mwa mbumba yakuti nee ukhaidziwa kale. Yahova mbakhale wadidi kwa iwe!’

Rute atawira: ‘Mbuya, ndimwe wadidi kakamwe kwa ine. Malongero anu adidi kwa ine andicitisa kupibva mwadidi.’ Bowazi afuna kakamwe Rute, natenepa, mwakukhonda pita nzidzi wakulapha iwo akwatirana. Pyenepi pyakomeresa tani Naomi! Mbwenye Naomi akomerwadi kakamwe mudabala Rute na Bowazi mwana wawo wakutoma wamamuna, wakucemerwa Obedi. M’kupita kwa nzidzi Obedi adzakhala mbuya wa Davidi, anafunefe kudzapfunza pizinji pya iye kutsogolo.