51-нҗи хекая

Рут Ве Наоми

МУКАДДЕС Язгыларда Рут атлы китап бар. Бу китапда Ысрайыл казыларының дөврүнде яшан бир машгаланың тарыхы язылыпдыр. Рут моаблы яш гелин. Ол Худайың халкындан дәлди. Йөне Рут хак Худай Ехованы танап, оңа сөйгүси артяр. Ехованы танамага оңа Наоми диен гарры аял көмек эдйәр.

Наоми ысрайыллы аял. Ысрайылда ачлык боланда, ол адамсы ве ики оглы билен Моаб юрдуна гөчйәр. Бирнәче вагтдан Наоминиң адамсы арадан чыкяр. Соңра Наоминиң огуллары моаблы гызлара өйленйәр. Гелинлериң бириниң ады Рут, бейлекисиниң ады болса Орпа. Йөне он йылдан Наоминиң ики оглы хем арадан чыкяр. Шонда Наоми гелинлери билен гаты гам чекйәр. Наоми инди нәме эдеркә?

Бир гүн Наоми юрдуна доланмакчы боляр. Рут билен Орпа Наоминден айрыласы гелмән, онуң билен гидйәрлер. Олар бираз ёл геченде, Наоми гелинлерине бакып: «Эҗеңизиң өйүне доланың ве олар билен яшаң» диййәр.

Наоми гелинлерини огшап хошлашяр. Гелинлери Наомини говы гөрйәнлиги үчин аглашып: «Ёк, биз сениң билен сениң юрдуңа гидерис» диййәрлер. Наоми олара: «Гызларым, говусы өйүңизе доланайың» диййәр. Соңра Орпа өйүне гидйәр, Рут болса Наоми билен галяр.

Шонда Наоми Рута: «Орпа гитди, сенем гидәй» диййәр. Рут болса: «Маңа гит дийме! Мени өзүң билен алып гит. Сен нирә гитсең, менем шол ере гидерин. Сен ниреде яшасаң, менем шол ерде яшарын. Сениң халкың мениң халкым болар, сениң Худайың мениң Худайым болар. Сени ниреде җайласалар, мени хем шол ерде җайларлар» диййәр. Шондан соң Наоми хич зат диймейәр.

Ахыры олар Ысрайыла барып, шол ерде яшап башлаярлар. Шол вагт мейданда арпадан хасыл йыгнаярдылар, Рут хем мейданда ишлемәге башлаяр. Боаз атлы адам оңа өз мейданындан арпа йыгнамага ругсат берйәр. Боазың эҗесиниң кимдигини билйәңми? Ол Эриха шәхериндәки Рахавды.

Бир гезек Боаз Рута: «Мен сен барада, Наомә эден ягшылыгың барада кән эшитдим. Мен сениң ата-энеңи, юрдуңы терк эдип, ят юрда яшамага гелениңи билйәрин. Ехованың мерхемети сениң билен болсун!» диййәр.

Рут оңа: «Хоҗайыным, сен маңа ягшылык эдйәң, сениң ягшы сөзлериң маңа яраяр» диййәр. Боаз Руты халап өйленйәр. Наоми муңа гаты бегенйәр. Хачан-да оларың илкинҗи оглы Обед догланда болса, Наоминиң бегенҗиниң чәги ёкды. Нетиҗеде, Обед Давудың атасы боляр, бу барада биз соңра көпрәк билерис. Мукаддес Язгыларың

Рут китабы.