ANTA kBiblia natekgsa akgtum libro wanikan Rut. Chu anta lichuwinan xlakata akgtum familia nema xlamakgolh kxkilhtamaku akxni li Israel xkgalhikgoy xlakkaxtlawananin taʼakglhuwit. Rut chatum tsumat xalak Moab, ni anta xtapakgsiy kʼIsrael, xkachikin Dios. Pero akxni Rut katsilh xlakata xaxlikana Dios Jehová, lu paxkiy. Noemí chatum puskat tiku xlina xkata chu makgtayalh Rut nalakgapasa Jehová.

Noemí li Israel. Noemí, xchixku chu chatiy xkamanan ankgolh litawilakgoy kkachikin wanikan Moab akxni nixʼakchan taway anta Israel. Akgtum kilhtamaku, xchixku Noemí nilh. Alistalh, xkamanan Noemí tatamakgaxtokgkgolh laktsuman xalak Moab xkawanikan Rut chu Orpá. Max titaxtulh akgkaw kata, xkamanan Noemí nikgolh. ¡Lu lilakgaputsa! ¿Tuku xʼama tlaway Noemí?

Akgtum kilhtamaku Noemí lakapastakli nataspita niku wilakgolh xtachiki, makgat xwanit. Rut chu Orpá ni makgxtakgputunkgoy chu taʼankgolh. Pero akxni nina lu makgat xʼankgonit anta ktiji, Noemí kawani laktsuman: Kataspittit anta niku kminkachikinkan chu katatamakgxtakgtit mintsekan.

Noemí kalakatsukli xlakata xʼamaja. Chu xlakan tsukukgolh tasakgoy xlakata lu xpaxkikgoy Noemí. Wanikgoy: ¡Ni! Akinin nakkataʼanan anta niku wilakgolh mintachiki. Pero Noemí kakgalhtilh: Katlawatit litlan kilaktsuman kataspittit. Tlakgtlan nakakitaxtuniyan natatawilayatit mi familiajkan. Wa xlakata Orpá taspitli niku xminitancha. Pero Rut ni taspitli.

Noemí wanilh Rut: Orpá anit. Na katataspitti. Pero Rut kgalhtilh: ¡Nikiwani nakmakgxtakgan! Kakimaxki talakaskin naktaʼanan. Anta niku napina anta nakan, chu anta niku nalatapaya anta naklatamay. Minkachikin kinkachikin nawan chu mi Dios na kiDios nawan. Anta niku wix naniya anta nakniy, chu anta nakimaknukan. Akxni Rut chuna wankgolh Noemí nialh wanilh kataspitli.

Chalh kilhtamaku akxni xkgalhtiykan lakpuskatin chankgolh kʼIsrael. Anta latamakgolh. Rut lakapara tsukulh skuja anta kakiwin, xlakata kilhtamaku akxni makgalakan cebada. Chatum chixku wanikan Booz (Boaz) maxkilh talakaskin nalakaputsay cebada nema xakgataxtunit anta kxkakiwin. ¿Katsiya wix tiku xtse Booz? Rahab, anta xalak Jericó.

Akgtum kilhtamaku Booz waniy Rut: Katuwa kkgaxmatnit lichuwinankana xlakata lu tlan likatsiniya Noemí. Kkatsiy pi makgxtakgti mintlat chu mintse chu minkachikin chu tanita litawilaya unu akgtum kachikin nema ni xlakgapasa. ¡Lu kskiniy Jehová pi kasikulanatlawan!

Rut kgalhtinalh: Lu tlan likatsiya kimalana. Tlakg tlan klimamakgkatsiy xlakata putum tuku xatlan nema kiwani. Chu Booz lu xatlan tsumat akxilhli Rut, chu ni makgas alh kilhtamaku tatamakgaxtokgli. ¡Uma lu makgapaxuwalh Noemí! Pero Noemí tlakg lipaxuwalh akxni Rut chu Booz kgalhikgolh xapulana xkgawasa, xtukuwani Obed. Alistalh Obed xtata wa David alistalh tlakg nakatsiyaw xlakata David.