OMU Baibuli noija kusangamu ekitabu ekirukwetwa Rusi. Oruganikyo orurukukwata ha maka agakaba garoho omubwire Isareri aha yaberiire n’abacwi b’emisango. Rusi akaba ali mukazi muto kuruga omunsi ya Moabu. Akaba atali w’ihanga lya Isareri. Rusi obu yamanyire bingi hali Yahwe Ruhanga ow’amananu akamugonza muno. omukaikuru Naomi niwe yakonyiire muno Rusi kwega hali Yahwe.

Naomi akaba ali omukazi Muisareri. Uwe na iba hamu n’abatabani baabu babiri bakafurukira omu nsi ya Moabu obu omu nsi ya Isareri hakaba haliyo enjara. Kiro kimu, iba wa Naomi akafa. Hanyuma batabani ba Naomi bakaswera abakazi b’Abamoabu babiri abamanywaga nka Rusi na Orupa. Baitu hanyuma y’emyaka 10, batabani ba Naomi nabo bakafa. Kinu kakikatuntuza muno Naomi hamu n’abakazi babu! Hati Naomi akaba naija kukora ki?

Kiro kimu Naomi akacwamu kugaruka omu nsi y’abantu b’owabu. Rusi na Orupa bakaba nibagonza muno kwikara nawe, nahabwekyo bakacwamu kugenda nawe. Baitu obu bagenzireho omwanya, Naomi yahindukira abakazi banu n’okubagambira ati: ‘Mugarukeyo owanyu mwikale n’abazaire banyu.’

Naomi akabanywegera yabaraga. Habwire obu bakatandika okucura habwokuba baali nibagonza muno Naomi. Bakagira: ‘Nangwa! Tuligenda naiwe hali abantu bowanyu.’ Baitu Naomi agamba ati: ‘Kiribabera kirungi. Mugarukireyo owanyu.’ Nahabwekyo Orupa agarukayo owabu. Baitu Rusi taragenzere.

Naomi yahindukira Rusi namugamba ati: ‘Orupa agarukireyo. Naiwe garukayo owanyu.’ Baitu Rusi yagarukamu: ‘Leka kumpambiriza kukuleka! Ndeka ngende naiwe. Holigenda niho ndigenda. Holikara nuho ndikara. Abantu bawe baliba bantu bange. Na Ruhanga wawe aliba Ruhanga wange. Holifeera niho ndifeera kandi nuho ndizikwa.’ Rusi obu yagambire ebi byoona, Noami atagarukemu kumuhambiriza kugarukayo owabu.

Hampero abakazi banu ababiri bakahika omu Isareri. Nuho batandikire kwikara. Rusi akatandika kukora omu musiri habwokuba bukaba bwire bw’okugesa sayiri. Omusaija omu arukwetwa Boazi akamwikiriza kugesa sayiri mu misiri ye. Nomanya nyina Boazi? Akaba oli Rahabu owomu rubuga orwa Yeriko.

Kiro kimu Boazi akagambira Rusi ati: ‘Mpulire bingi ebirukukukwataho kandi nkoku oyolekere Naomi ekisa. Manyire ngu okalekayo so na nyoko n’ensi y’owanyu kandi waija kwikara n’abantu abokaba otamanyire. Yahwe akuhe omugisa!’

Rusi akagarukamu: ‘Obaire n’ekisa kingi hali nyowe. Mpuliire kurungi muno nkoku obalize nanyowe mumulingo omurungi guti.’ Boazi akagonza muno Rusi kandi mukasumi kake muno bakaswerangana. Kinu kikasemeza muno Naomi! Baitu Naomi akatunga okusemererwa kwingi Rusi na Boazi obu bazaire omwana wabu ow’okubanza ou barukire Obedi. Hanyuma Obedi akafooka isenkuru Daudi ou turukwija kwegaho ebintu bingi omu maiso aho.