LÓ LA Biblia sadzelo toib libro ni laa Rut. Nacní toib libro ni raniʼ de toib family ni bibany ló dzú ni gop Israel jueces. Rut toib mbioxhlas de gudx Moab; láabu diti nacbu buñ de Israel, xcudx Dios. Per órni Rut rasuidy de Jehová ni rasuidy xinésni, Rut rasaló randxigolu Dios. Noemí ni gocné a Rut par bimbu a Jehová ma buñgol nacbu.

Noemí buñ israelita láabu. Láabu né tzeelbu né guiropca xiimbu goylésyibu gudx Moab órni goyoʼ govinn galrro ro golés israelitas. Toibtica dzú tzeʼel Noemí goity. Godudy dzú xiin Noemí cuaʼyibu chop mbioxhlas moabitas ni góc laa Rut né Orpá. Godudy chii íz de goló cuaʼyibu buñ goityibu. ¡Ndeʼ nigolú goloʼ nabanni Noemí! ¿Xí láani gonybu nigoreʼ?

Toibtica dzú Noemí ragoʼ guic guibiguet ro dxee buñ xcudx, toib lagary nigolú sit. Rut né Orpá náapa tze né láabu, né láaca rony compañeryibu Noemí. Per órni ma xiroʼ gosaayibu ló néz, Noemí raiby a chop mbioxhlas reʼ: Colguibiguet lagary ro sieedto né colguian né xinaʼto.

Noemí raduidy bixit a guiropca xolidx né ranibu sacró coltzé. Layibu rasaló ribdxaʼyibu, portín nadxigolúyibu Noemí. Raniyibu: ¡Yaca! Lóodo tzódo né looy ronoʼ buñ xcudxlo. Per Noemí racapy layibu: Xiindzapa, lóoto non guibiguetto. Sieeni más galán lóoto ronoʼ xfamilto. Ór cú Orpá ranás néz né rabiguet lidx. Per Rut diti rabiguet.

Noemí radxiguet lóo né raibybu a Rut: Orpá ma bibiguet. Bibiguetné láabu. Per Rut racapy: ¡Diti gonylo que guisiana looy! Biduidy lagary naʼ gony compañer looy. Ro tzélo naʼ tzaaya, né ro cuéslo cú cuésa. Xcudxlo sac xcudxi né Dios xtunylo gac Dios xtuni. Lagary ro gaitylo naʼ gati, né cú sacachyibu naʼ. Órni Rut ralox raniʼ guirá ndeʼ, Noemí raduidy lagary gony compañer Rut láabu.

Radxiin dzú chop buñgonaʼ reʼ radxiinyibu Israel. Lagary reʼ rabésyibu. Rut ni maca rasaló rony dxiin, portín xtzú ni ratop buñ cebada láani. Toib buñguieeu ni laa Boaz raduidy lagary guitopbu cebada lainy xalioobu. ¿Nanlo chú ngú xinaʼ Boaz la? Láabu ngú Rahab, de gudx Jericó.

Toib dzú Boaz raiby a Rut: Ma bicadiaga xidal cós tzaay de looy né que buñtzay nacloʼ né Noemí. Nandxichi que bisianlo bixioslo, xinaʼlo, xcudxlo né sieedlo sitléslo lad toib gudx ni diti ma bimbulo. ¡Raniiny naʼ que Jehová guiduidy galnasác looy!

Rut racapy: Looy nigolú buñtzay nacloʼ né naʼ. Guirá cós buen ni ma gochlo naʼ galán láani par naʼ. Boaz nigolú rioladxbu mod nac Rut né diti xidzú ronyibu galtzeʼel. ¡Guirá ni ronybu rabaladx Noemí! Per Noemí más rabaladx órni Rut né Boaz rioʼ primer xiinyibu ni goleʼyibu laa Obed. Después Obed radxiin rac bixiogol David, de buñguieeu reʼ ni laa David guisuidyno más ló historias ni sietra.