¿KUNSA kamachasipki, uk uñjtati? Aka jaqinakax Israel soldadonakawa. Altʼatäsipki ukanakax umwa umtʼasipki. Gedeón sata taripiristi uka jakʼankaskarakiwa. Kunjamsa umasipki uk uñchʼukiski.

Sum uñjañäni, aka jaqinakax janiw kikpak umtʼapkiti. Mayninakaxa umakam alxatasin umasipki. Ukat maynixa uksa aksa uñtasaw amparamp umtʼaski. Ukaxa wali askiwa, ukham umtʼirinakarukiwa ajllïta sasaw Jehová Diosaxa Gedeonar satayna. Ukat mayninakax utapar kuttʼxapxañapawa. Kunatsa ukham sispachäna uk yatxatañäni.

Israelitanakax jan waltʼañan uñjasipxäna, Jehová Diosaruw mayampi jan istʼapkänti. Madianitanakax wali chʼamanïxapxänwa ukat israelitanakaru wal tʼaqhisiyapxäna. Ukatwa israelitanakax Diosar artʼasipxäna, ukat Jehová Diosax jupanakar istʼänwa.

Soldadonak jawsthapim sasaw Jehová Diosax Gedeonar säna, ukat iyaw sasaw 32.000 jaqinak jawsthapïna. Ukatxa Israel contraxa 135.000 soldadonakaw utjäna. Ukampisa, ‘sinti waljaniw jaqinakamax’ sasaw Jehová Diosaxa Gedeonar säna. ¿Kunatsa ukham sispachäna?

Israelitanakasti atipasaxa, nanakaw atipapxta sapxasapänwa, janiwa Jehová Diosan chʼamapax atipañatak munaskiti sapxasapänwa. Ukatwa Jehová Diosaxa Gedeonaru akham säna: ‘Axsaririnakax utapar sarxapxpan’ sasa. Uk sataxa, 22.000 jaqinakaw sarxapxäna. Ukhamaxa, 135.000 soldadonakar saykatañatakixa 10.000 soldadonakakiw utjxäna.

Istʼañäni, Jehová Diosax akham saskakïnwa, ‘waljanïsipkakiwa’ sasa. Ukhamasti uma umtʼir sarapxma, ukat umar alintasa umtʼirinakaruxa khitxañamaw sasawa Gedeonar säna. ‘Umtʼkasa amuyasiri, uka 300 jaqinakampiw nayax qhispiyapxäma’ sasaw Jehová Diosax säna.

Nuwasiñ urux purinïnwa. Uka 300 jaqinakarux kimsa tamaruw Gedeonax jaljäna. Sapaqataruw mä pututumpi, chʼusa wakullampi ukan nina nakhañapataki churäna. Ukat niya chika arumäxäna ukhawa uñisirinakapar muyuntapxäna. Ukatxa mayak pututtʼapxäna ukat wakullanakap pʼakirapxäna, ukat akham sasaw artʼasipxäna: ‘¡Diosampita, Gedeonampita!’ sasa. Kunapachatï uñisirinakapax uñatatapxäna ukhaxa jupanakkamawa nuwarasipxäna wal sustjasipxäna. Taqiniw chhuktxapxäna, ukhamatwa israelitanakax atipapxäna.