Gideon novarwe ve 300
EHUNGI 52
Gideon novarwe ve 300
OVE mo munu kutja mape kayenda tjike mba? Avehe mba ovarwe wovita vaIsrael. Ovarumendu mba mbu ve ripete mave nu omeva. Omurumendu ngwa kurama meṋe yawo omupangure Gideon. Eye ma tara omuano owo mbu mave nu omeva.
Tara nawa komiano pekepeke ovarumendu imba mbi mave nu omeva. Tjiva va ṱunisa omirungu vyawo momeva. Nungwari umwe wawo ma woto omeva nomake we, kokutja eye ma tjevere imbi mbi mavi tjitwa ongondoroka naye. Ihi otjinanḓengu, mena rokutja Jehova wa raera Gideon kutja nga toorore ovarumendu imba porwawo mbu mave tjevere ngunda amave nu omeva. Otjihupe tjawo Mukuru wa tja ngave yarurwe konganda. Indjo tu tare kutja omena ratjike.
Ovaisrael ve ri moumba ounene rukwao. Omena rokutja owo kava ri nonḓuviro ku Jehova. Ovamidian va hara omasa pu wo nu aave ve ṋiṋikiza. Okutja Ovaisrael va urakana ku Jehova me ve vatere, nu Jehova wa puratena komauriro wawo.
Jehova wa raera Gideon ma pahe ovarwe vovita, okutja Gideon wa woronganisa ovarwe 32 000. Nungwari pa ri ovarwe vovita 135 000 mbaave ru kuna Ovaisrael. Na kombanda yanao Jehova wa raera Gideon: ‘Ovarwe mbu u nawo ovengi tjinene.’ Omena ratjike Jehova tja hungira nao?
Omena rokutja Ovaisrael tji va taara ovita, owo mape ya ave ripura kutja va taara momasa wawo oveni. Owo mape ya ave ripura kutja kave nokuhepa ombatero yaJehova okutaara. Kunao Jehova wa raera ku Gideon: ‘Raera ovarwe avehe mbu mave tira kutja ngave yaruke konganda.’ Indu Gideon tja tjita nao, ovarwe ve 22 000 vovita va yaruka konganda. Okutja eye wa sewa novarwe 10 000 uriri okurwa kuna ovarwe vovita avehe mbo 135 000.
Nungwari puratena Jehova tji ma tja: ‘Ove ngundee u novarwe ovengi tjinene.’ Okutja eye wa raera Gideon kutja ma nwise ovarwe mba omeva poruharwi okuzambo ma hinde avehe konganda mbu mave ṱunisa omirungu vyawo momeva tji mave nu omeva. Jehova we mu kwizikira a tja: ‘Ami me ku pe ondoṋeno novarumendu mba 300 mbaave tjevere ngunda amave nu omeva.
Oruveze rwovita rwa yenena. Gideon wa twa ovarwe ve 300 movimbumba vitatu. Nu omurwe auhe we mu pa ohiva, notjitjuma mu mwa ri emunine. Pu pe ṱa mokati kouṱuku, owo va woronganena ongondoroka nozondanda zovanavita vawo. Okuzambo, potjikando tjimwe, owo va posisa ozohiva zawo nave nyanyaura ovitjuma vyawo nave ravaere ave tja: ‘Enga raJehova noraGideon!’ Ovarwe ovanavita nawo tji va penduka, owo va purukire nu va urumine. Owo avehe va uta okutupuka, nu Ovaisrael va taara otjirwa.
