KỌ WHỌ ruẹ oware nọ o bevia eva etenẹ? Enana kpobi yọ egba ohọre ahwo Izrẹl. Ezae nọ iruwẹ na abe da ame. Obroziẹ Gidiọn odikihẹ kẹlae na. Ọ be ghẹrai oghẹrẹ nọ a te rọ da ame na.

Muẹrohọ oghoghẹrẹ idhere nọ a be rọ da ame na. Ejọ a nwane va ovao rai tu ame na. Rekọ ọ jọ ọ be rehọ obọ sẹrẹ ame na da, yọ o bi ri re ọ sae ruẹ oware nọ obe via kẹliẹe. Onana orọ oja, keme Jihova ọ ta kẹ Gidiọn nọ ọ salọ ezae nọ e be ghẹ yọ a be da ame. Enọ ikiọkọ Ọghẹnẹ ọ ta nọ, o viai zihe kpo. J’oma ruẹ onọ osoriẹ.

Ahwo-Izrẹl a zoma rọ eva ikpokpoma. Fiki epanọ a yo ẹme kẹ Jihova ha. Ahwo Midian a wo ogaga viai a tẹ be nwae oma. Fikiere Ahwo-Izrẹl a te bo se Jihova re ofiobọhọ kae, Jihova ọ tẹ gaviezọ kẹ unubo rai.

Jihova ọ tẹ ta kẹ Gidiọn nọ ọ rehọ ogbaẹmo, fikiere Gidiọn o te koko ezae egba ohọre 32,000 koko. Rekọ yọ ezae ogbaẹmo nọ i bu te 135,000 a bi ti lele Izrẹl họre. Yọ dede na Jihova ọ ta kẹ Gidiọn nọ: ‘Ahwo ra a bu hrọ.’ Fikieme Jihova ọ jẹ ta oyena?

Fikinọ Izrẹl tẹ kparobọ ẹmo na, a re ti roro nọ ogaga obọ rai a rọ kparobọ. A re ti roro nọ a du gwọlọ obufihọ Jihova re a tẹ kparobọ họ. Fikiere Jihova ọ tẹ ta kẹ Gidiọn nọ: ‘Ta kẹ ezae nọ ozọ ubimu kpobi nọ a zihe kpo.’ Nọ Gidiọn o ru onana, ezae 22,000 otu ohọre riẹ a te zihe kpo. Oyena o tẹ se ezae 10,000 ọvo ba re a ti lele egbaẹmo 135,000 họre.

Rekọ gaviezọ! Jihova ọ ta nọ: ‘Ahwo nọ who wo a gbe bu hrọ.’ Fikiere ọ tẹ ta kẹ Gidiọn re ọ rehọ ahwo na e da ame eva uto nana re enọ evova tu ame be da o zihai kpo. ‘Mẹ te rehọ ezae 300 na rọ kẹ owhẹ obokparọ enana nọ e be ghẹ yọ abe da ame na,’ Jihova ọ ya eya na.

Oke u te no kẹ ohọre na. Gidiọn o te fiọ ezae 300 na họ ẹko esa. Ọ rehọ ọgba rọkẹ omomọvo, gbe omototo avọ ukpẹ-obọ nọ oriẹ eva. Nọ oke u ti te oke wọhọ udevie aso, ai kpobi a te koko wariẹ evuẹ ọrọ elakpa-ẹmo ewegrẹ na. Kẹsena eva oke ọvo yena, akporo egba rai a te je kpe emetoto rai, a tẹ va inọ: ‘Ọgbọdọ Jihova avọ ọ rọ Gidiọn!’ Okenọ elakpa-ẹmo ewegrẹ na a tovrẹ ze, a te reghe avọ ozọ. Ai kpobi a te muhọ ẹdhẹ, Ahwo-Izrẹl a tẹ kpare obọ ẹmo na.