Gidɛun d lɛeskeṛ-is
TAQSIṬ TIS 52
Gidɛun d lɛeskeṛ-is
ACU akka i teţwaliḍ dagi? Irgazen-agi meṛṛa d lɛeskeṛ n Isṛayil. Wagi yellan ɣer tama n yergazen-agi yeknan akken ad swen, d lqaḍi Gidɛun. Yeţmuqul amek i tessen aman.
Muqel mliḥ mliḥ amek i tessen. Kra seg-sen qerrben udem-nsen ɣer waman. Lameɛna yella yiwen itess aman s ufus-is, swakka yezmer ad iwali ayen iḍerrun di yal tama. Annect-a yesɛa azal, axaṭer Yahwa yumeṛ i Gidɛun ad yextiṛ wid kan yeţɛassan iman-nsen m’ara tessen. Ma d wiyaḍ ilaq-asen ad uɣalen s ixxamen-nsen. A nwali acuɣer.
At Isṛayil atnan diɣen di ccedda tameqrant. Yeḍra-d waya axaṭer ur uɣen ara awal i Yahwa. At Midyan zeyyṛen-ţ fell-asen yerna ţqehhiren-ten aṭas. Dɣa At Isṛayil suɣen ɣer Yahwa akken a ten-iɛiwen. Yahwa yesla-d i leɛyaḍ-nsen.
Yahwa yenna i Gidɛun a d-yejmeɛ lɛeskeṛ. Dɣa Gidɛun ijmeɛ-ed 32 000 n yergazen n ṭṭrad. Lameɛna ixṣimen i d-yusan ad nnaɣen d Isṛayil llan di 135 000 yid-sen. Ɣas akka, Yahwa yenna i Gidɛun: ‘Bezzaf n yergazen i gellan yid-ek.’ Acimi i d-yenna Yahwa ayagi?
Axaṭer ma rebḥen wat Isṛayil, izmer lḥal a s-inin s tezmert-nsen i ten-ɣelben. Zemren ad ɣilen ur ḥwaǧen ara Yahwa akken ad rebḥen. Ɣef waya i gumeṛ Yahwa i Gidɛun: ‘Ini i wid akk yugaden ad kecmen s ixxamen-nsen.’ Mi gexdem aya Gidɛun, 22 000 n iɛsekṛiwen i gṛuḥen. Qqimen-d kan 10 000 ara yemceččawen nutni d 135 000 n yexṣimen-nni.
Lameɛna, ḥess kan i wayen i s-yenna Yahwa: ‘Mazal-ik tesɛiḍ bezzaf n iɛsekṛiwen.’ Ihi yumeṛ i Gidɛun ad yawi irgazen yeddan yid-es ad swen deg wasif, mbeɛd ad yerr s ixxamen-nsen wid akk ara iqerrben udem-nsen ɣer waman. Yahwa iɛuhed: ‘S 300 n yergazen i gɛussen iman-nsen m’akken i swan ara kkun-sellkeɣ.’
Yusa-d wass umenɣi. Gidɛun yebḍa 300 n yergazen yeddan yid-es ɣef tlata n terbaɛin. Yefka i yal yiwen deg-sen lbuq, abuqal akk-d usafu sdaxel-is. Uqbel kan ad inṣef yiḍ, zzin-d akken ma llan i wegrur n yeɛdawen-nsen. Imiren kan ssendhen lbuq, rẓan ibuqalen-nsen, ɛeggḍen: ‘Ssif n Yahwa akk-d Gidɛun!’ Mi d-dduqqsen yexṣimen-nsen, iffeɣ-iten leɛqel, tweḥcen. Imiren bdan regglen akken ma llan, dɣa rebḥen wat Isṛayil lgirra.
Inezzurfa ixef wis 6 alamma d wis 8.