ПЛЪАГЪУРЭ мыбдеж къыщыхъур? Мыхэр израиль зауэлІхэращ. Ахэр псы йофэ, зырагъэзыхауэ. Абыхэм ящхьэщытыр хеящІэ Гедеонщ. Ар кІэлъоплъ ахэр псы зэрефэ щІыкІэм.

Еплъыт набдзэгубдзаплъэу цІыхухъухэр зэхуэмыдэу псы зэрефэм. Зыгуэрхэм я щхьэр псым хащІэу йофэ. Зыр ІэгукІэ псы ефэурэ и хъуреягъкІэ къэхъум кІэлъоплъ. Абы мыхьэнэ иІэщ, сыт щхьэкІэ жыпІэмэ Иеговэ Гедеон къыхихын хуейуэ жриІар псы щефэкІэ сакъхэращ. Алыхьым унафэ зэрищІамкІэ адрейхэм унэм ягъэзэжын хуейщ. КъэтщІэнти сыт щхьэкІэми.

Аргуэру израилхэр Иеговэ зэремыдаІуэм щхьэкІэ бэлыхь хэхуащ. Ахэр мадианхэм ягъэпщылІ. Абы щхьэкІэ израилхэр Иеговэ худокъугъей, Иегови ахэр зэхех.

Иеговэ Гедеон унафэ хуищІащ дзэ зэхуишэсыну. Абы зэуэлІ 32 000–рэ зэхуишэсащ. Израилым къезэуэну зэхуэсащ дзэ, зауэлІ 135 000–рэ хъууэ. ИтІанэ Иеговэ Гедеон жреІэ: «ЦІыху куэдыІуэ уигъусэщ». Сыт Иеговэ апхуэдэу щІыжиІар?

Израилхэм текІуэныгъэр къахьмэ, абыхэм ягугъэнут ар езыхэм я текІуэныгъэу, текІуэн щхьэкІэ Иеговэ къадэмыІэпыкъуауэ. Аращ апхуэдэу щІыжиІэн хуей хъуар. АдэкІэ Иеговэ Гедеон жреІэ: «Шынэкъэрабгъэхэм яжеІэ унэм ягъэзэжыну». Гедеон ар яжриІа нэужь, зэуэлІ мин 22–м унэм ягъэзэжащ. Арати, абы и гъусэу къанэр зауэлІу 10 000 къудейщ, бий зауэлІыу 135 000-м пэщІэувэну.

Еплъыт! Иеговэ аргуэру жеІэ: «ЦІыхуу уи гъусэр иджыри куэдыІуэщ». Абы Гедеон унафэ хуещІ и зэуэлІхэр псы ежэхым деж къишэу псы щефэкІэ зезыгъэзыхауэ ефэхэм псоми унэм яригъэгъэзэжыну. Иеговэ къегъэгугъэ ар: «Псы щефэм сакъыу ефа зэуэлІ 300-р уи гъусэу текІуэныгъэр къэпхьынымкІэ сыбдэІэпыкъунущ»,— жеІэри.

Щызэуэну зэманыр къос. Гедеон зэуэлІ 300–р егуэш гупищу. ЗэуэлІ къэс ирет накъырэрэ зи кІуэцІым мафІэ бзий зэрыт кхъуэщынрэ. Жэщыбгыр къыщысым абыхэм къаухъуреихь бийхэм я тІысыпІэр. ИтІанэ зэгъусэу накъырэм йопщэ, кхъуэщынхэр якъутэри мэкІий: «Иеговэрэ Гедеонрэ я джатэ!» Бий къэушахэр мэгужьейри Іэнкун мэхъу. Ахэр щІопхъуэжыр. Израилым текІуэныгъэр къехь.