NANCHI wamona kibena kubiwa pa kikye kipikichala nyi? Bano bonse bajinga banabalume bena Isalela ba nkondo. Abe banabalume babandama babena kutoma mema. Mutonyi Gidiona ye waimena kwipi na ko baji. Ubena kumona byo babena kutoma mema.

Akimwesha ntomeno yapusana pusana ya bano banabalume. Bamo bakinka bilungi byabo pa mema. Umo ubena kutomena mema mu kuboko saka ainuka, pa kuba’mba akenkentenga bulongo bibena kubiwa. Kino kyanema bingi, mambo Yehoba waambijile Gidiona kusala banabalume bakenkentelenga pa kutoma mema. Lesa waambile’mba, aba babujilenga kukenkenta bakabwelemo ku muzhi. Twaya tumone kyalengejile.

Bena Isalela bajinga jibiji mu lukatazho. Bajinga mu lukatazho mambo kechi bakokejile Yehoba ne. Bena Mijanyi bebakijile bulume, kabiji bebakozhezhenga. Kepo bena Isalela bamujijile Yehoba kuba’mba ebakwashe, kabiji Yehoba waumvwine kujila kwabo.

Yehoba waambijile Gidiona kusenda nzhita, kabiji Gidiona wapwizhizhe pamo banabalume ba kulwa nkondo 32,000. Bino nzhita yaishile na kulwa na bena Isalela yajinga 135,000. Bino Yehoba waambijile Gidiona amba: ‘Bantu bo uji nabo bavula.’ Mambo ka Yehoba kyo aambijile bino?

Waambile bino mambo a kuba’mba umvwe bena Isalela baji bashinjile nkondo, inge balangulukile’mba bashinjile na bulume bwabo. Bakonsheshe kulanguluka’mba kechi bafwainwe kwibakwasha kwi Yehoba kuba’mba bashinde ne. Kepo Yehoba aambijile Gidiona amba: “Umvwe kuji muntu uji na moyo ne kuzakama abwele kwanji ku muzhi.” Gidiona byo aambile bino byambo, banabalume ba nkondo 22,000 babwelelemo kwabo. Kwashajiletu banabalume 10,000 ba kulwa na bashilikale 135,000.

Yehoba wabwelele wamwambila’mba: ‘Ne pano bantu bakivulatu.’ Kepo amwambijile Gidiona kuba’mba aye na bantu na kukatoma mema mu uno mukola, ne kubwezha bonse bakinkile bilungi byabo pa mema pa kutoma. Yehoba wamulayile’mba: ‘Nkakupokolola na bano bantu 300 baji kukenkentanga pa kutoma mema.’

Kepo kimye kya kulwa kyafikile. Gidiona waabenye bantu banji 300 mu bipanyi bisatu. Wapaine ku yense ntolompita, mulondo ne nsoko mukachi ka mulondo. Byo bwayijile, bonse bazhokolokele kampu wa bashilikale bajinga balwanyi babo. Kepo bonse baimbile matolompita abo pa kimyetu kimo, ne kulala milondo yabo, ne kubijika amba: ‘Mpoko ya kwa Yehoba, ne ya kwa Gidiona.’ Bashilikale bajinga balwanyi byo babukile, bavulañene, ne kumvwa moyo. Bonse batendekele kunyema, kabiji bena Isalela bashinjile yoya nkondo.