Esimwititi 52: Ngidiyona novagara vendi 300
TO MONO asi yinke yina kuhoroka apa? Ava kuna kara vakwayita vaIsraeli. Vagara ava vana nyongama kuna kunwa mema. Mupanguli Ngidiyona kuna kara mugara ogo ana sikama pepi nawo. Age kuna kutarera asi ngapi omu vana kunwa mema.
Tarurura nawa nonkedi dokulisiga-siga omu vana kunwa vagara ava. Vamwe kuna nyongama noyipara yawo dogoro pomema pwene. Nye gumwe kuna kugusa mema nomawoko gendi, yipo a nomene nawa asi yisinke yina kuhoroka pomukunduruko gwendi. Eyi mulyo, morwa Jehova kwa tanterere Ngidiyona asi a horowore vagara vaava ava nomene posiruwo sooso vana kunwa. Karunga kwa tente asi wokukwama ko va kona kuvatengwida kembo. Tu tareni asi morwasinke.
Vaisraeli vana zi hena moudigu wounene. Konda kuna kara asi awo kapi vana limburukwa Jehova. Vantu woVamidiyani kwa nkondopere va va pangere ntani nokuvahepeka. Vaisraeli yipo vana kugu evatero kwaJehova, ano Jehova ta purakene konkugo zawo.
Jehova ta tantere Ngidiyona a pongaike vakwayita, ano Ngidiyona makura ta pongaike vagara wokurwa wokusika po-32 000. Nye vakwayita ava va wizire va ya rwise Israeli kuna kara 135 000. Nye nampili ngoso, Jehova ta tantere Ngidiyona asi: ‘Vakwayita woge vanzi unene.’ Morwasinke Jehova ana kuuyungira eyi?
Morwa nsene Israeli nazi funda yita, kuvhura va gazare asi mwavene vana yi fundire. Kuvhura va gazare asi kapi vana hepa ekwafo lyaJehova mokufunda. Jehova ta tantere Ngidiyona asi: ‘Tantera vagara navenye ava guna pwaga va tengure kembo.’ Ngidiyona apa ana yi rugana eyi, vakwayita vendi wokusika po-22 000 tava zi ko kembo. Eyi tayi mu sigi novakwayita 10 000 tupu ava nava ka rwisa vakwayita 135 000.
Nye purakena si! Jehova ta tanta asi: ‘Vakwayita simpe vanzi unene.’ Ta tantere Ngidiyona a tware vagara va ka nwe mema komukuro ano makura a ka tume kembo navenye ava nava ka nyongamena yipara yawo momema yipo va nwe kurasa. Jehova ta tumbwidire asi: ‘Ame tani mu pe efundo kumwe novagara 300 ava vana nomene apa vana nu.’
Yita makura tayi tameke. Ngidiyona ta tura vagara vendi 300 monombunga ntatu. Tava pe nkenye gumwe rumbendo nokavaza aka kana kara nondevendeve monda zako. Pokatji komasiku, navenye makura tava kundurukida kamba zovakwayita wononkore. Kumwe-kumwe navenye tava fuda nombendo dawo nokutavagura tuvaza twawo, oku tava zigire asi: ‘Rufuro rwaJehova noru rwaNgidiyona!’ Vakwayita wononkore apa vana kupinduka, vana piagana awo vana tukuka. Navenye tava tameke kuduka, ano Vaisraeli tava fundu yita.
Vapanguli magaununo 6 dogoro 8.
Mapuro
- Ngapi ntani morwasinke vana karere Vaisraeli moudigu wounene?
- Morwasinke ana tanterere Jehova Ngidiyona asi vakwayita vendi vanzi unene?
- Vagara vangapi vana hupu po apa ana tantere Ngidiyona wowoma va tengure kembo?
- Tara kefano o faturure omu ana sesupike Jehova sivaro sovakwayita vaNgidiyona si wize po vagara 300 tupu.
- Ngapi omu ana wapaike Ngidiyona vagara vendi 300, ntani ngapi omu zina fundu Israeli yita?
Mapuro gokugwederera ko
- Resa Vapanguli 6:36-40.
Ngapi omu ga divilisire Ngidiyona mpango zaJehova?
Ngapi omu ose naina atu divilisa mpango zaJehova?
- Resa Vapanguli 7:1-25.
Yinke natu vhura kulirongera ko kovena 300 va vangararere mokulisiga novena va likidire kupira sinka?
Moomu tupu vena 300 va lirongere pokutarera Ngidiyona, ngapi omu atu lirongo pokutarera Ngidiyona goMunene, Jesus Kristusa?
Vapanguli 7:21, ngapi omu ava tu vatere mokutambura kukakerera nkenye oku va tu tuma mombunga zaJehova?
- Resa Vapanguli 8:1-3.
Mokukohonona po madiro kulizuvha nomunanzinyetu, yinke natu vhura kulirongera ko konkedi ezi ga kohonene po Ngidiyona nomutangu kumwe noVaefurayimi?
