NG’OMUENE edi divangamene ovava? Omama i makesa ma vita ma Isaele. Wantu bafukamene mu nua maza. Muntu otelamene vana ndambu au i Ngidone wa Mfundisi. Okubatalanga una benwinanga o maza.

Tala mpila yaswaswana benwinanga. Akaka bakulwidi e ntu miau muna maza. Kansi, akaka banwinanga maza muna moko kimana bazay’oma mevangamanga. Ediadi diamfunu, kadi o Yave wavova kwa Ngidone vo kasola kaka ana beyingilanga ekolo benuanga. Ana balembi yingila bavutuka kwau kuna nzo. Yambula twazaya ekuma.

Aneyisaele mu mpasi diaka se bena, kadi ke balemvokela Yave ko. Esi Midiani basunda Isaele e ngolo bababangika. Ikuma, Aneyisaele balombele lusadisu kwa Yave. O Yave owidi e kazu kiau.

O Yave ovovese Ngidone vo kakutakesa 32.000 ma makesa ma vita. Kansi, Isaele onwaniswa kwa 135.000 ma makesa ma vita. Kana una vo i wau, o Yave ovovese Ngidone vo: “O nkangu wina yaku wingi.” Ekuma Yave kavovela wo?

Ekuma kadi, avo Isaele osundidi e vita nanga balenda yindula vo mu ngolo za yau kibeni basundila. Balenda yindula vo ke bavwidi lusadisu lwa Yave mfunu ko. Muna kuma kiaki, o Yave ovovese Ngidone vo: ‘Vovesa kwa nkangu vo, konso ona omona wonga yo zakama, mbula kavutuka kwandi kuna nzo.’ Vava kavova wo 22.000 ma makesa bavutukidi kuna nzo. Osidi kaka yo makesa 10.000 mu nwana ye makesa 135.000.

Kansi, wa una kavova o Yave: “Yamu wau o nkangu wingi.” Idiau, ovovese Ngidone vo ubanata kuna maza, vutulwisa kuna nzo konso ona okulula o ntu mu nwa o maza. Yave unkanikini vo: ‘Muna nkama tatu za wantu ana bayingilanga ekolo banwang’o maza ikunusundisila.’

E ntangwa ya vita ifwene. O Ngidone okayanese nkama tatu za makesa mu buka tatu. Ubavene mpungi ye mini muna mvungu. Vava kiafwana dingidingi bazungidi atantu au. Vana vau basikidi mpungi, bawudidi e mvungu yo kaza: “Nsosolo a Yave ye Ngidone.” Vava atantu basikama bamwene o wonga. Yau awonso batinini, Aneyisaele basundidi e vita.