Icisimicisyo 52: Gidyoni ne Balalume Bakwe 300
KANI wabona ifilukucitika apa? Bonse aba balalume ba nkondo aba baIsilaeli. Abalalume abenamisye pansi balukunwa amenda. Umwalalume uwimakene apepi nabo ni Gidyoni Umusololwesi. Alukubatamba ifi balukunwa amenda.
Lolekesya insila isipusenepusene isi abalalume balukunwinamo amenda. Bambi balukusiba ifinso fyabo penka pa menda. Pano umo alukukabala amenda mu maboko akwe, pakweba’ti angacencenta ifilukucitika apa ali. Ici cicindeme, pakuti baYehoba balyebele Gidyoni ukusalulula lukoso abalalume abatwalilila ukucencenta ili balukunwa. Abasyala, baLesa balabila ati, balyelelwe ukubabwelesya ku ŋanda. Leka tubone umulandu.
AbaIsilaeli bali mu makatasyo nakabili. Umulandu uli wakweba’ti tabomfwililepo baYehoba. Abantu ba ku Midyani bakwata amakosa pali bo kabili balukubasomesya. Popele abaIsilaeli balilila kuli baYehoba ati babofwe, kabili baYehoba bakutika ku kulila kwabo.
BaYehoba babula Gidyoni ukuteyanya ibumba lya fita, popele Gidyoni abunganya pamo abalalume ba nkondo 32,000. Pano kuli ibumba lya fita 135,000 abalalume abakulwa ne baIsilaeli. Nangabe’fyo baYehoba baeba Gidyoni ati: ‘Abalalume ukwete bafulisya.’ Mba nindo baYehoba balabiliile’fyo?
Nipakuti abaIsilaeli kani bacimfye nkondo, pambi bangalanguluka ati balicimfisye pa lwabo benka. Pambi bangalanguluka ati tabalukupengelapo ukofwa kwa baYehoba pakweba’ti bacimfye. Popele baYehoba balabila kuli Gidyoni ati: ‘Bebe bonse abalalume abali ne mwenso babwelele ku ŋanda.’ Ili Gidyoni acite’fi, abalalume ba nkondo 22,000 babwelela ku ŋanda. Asyala lukoso ne balalume 10,000 ukulwa na fyonse’fyo ifita 135,000.
Pano, kutika! BaYehoba balabila ati: ‘Ucili ulikwete abalalume abakuti ubwingi.’ Popele babula Gidyoni ukweba abalalume ukunwa pa mulonga uyu kabili eli abwelesyemo ku ŋanda bonse abantu abo abasiba ifinso fyabo pa menda pakweba’ti banwe. BaYehoba balaya ati: ‘Nakukupela ukucimfya ne balalume 300 abo abatwalilile ukulukucencenta ili baalukunwa.’
Impindi yafika iya kulwa. Gidyoni aabanya abalalume bakwe 300 mu mabumba atatu. Apeela ku mwalalume onse ipenga, ne nongo kumo ne mumosyo mukati. Ili cafika pakati ka busiku, bonse babungana ukusinguluka ibumba lya fita ifipate. Eli, pa muku umo, bonse balisya impenga syabo ne kutobala inongo syabo, ne kubilikisya ati: ‘Ni mpoko ya baYehoba ne yakwe Gidyoni!’ Ili ifita ifipate fyapapuka, fyafulungana kabili fyakwata ne mwenso. Fyonse fyatatika ukubutuka, kabili abaIsilaeli bacimfye’nkondo.
Abasololwesi ifyapitala 6 ukufika ku 8.
Ifyakwipusya
- Kani abaIsilaeli baba syani mu makatasyo aengi, kabili nipali wisa mulandu?
- Kani nindo baYehoba bamubulila Gidyoni ati alikwete abalalume abakuti ubwingi mwi bumba lya fita fyakwe?
- Kani nibanga abalalume basyalapo panuma ili Gidyoni abula abalalume abali ne mwenso ukubwelela ku ŋanda?
- Koti nifyefyo wabona mu cikope, londolola ifi baYehoba bacefya inambala ya fita fyakwe Gidyoni ukusyala lukoso abalalume 300.
- Kani Gidyoni ababanya syani abalalume bakwe 300, kabili Isiaeli acimfya syani inkondo?
Ifyakwipusya na fimbi
- Pendeni Abasololwesi 6:36-40.
Kani Gidyoni alisininkisye syani ati ukufwaya kwa baYehoba kwacitwa?
Kani fwebo muli bulelo tulafwailisya syani pakweba’ti tukwisibe ukufwaya kwa baYehoba? (Ifisi. 2:3-6; Mat. 7:7-11; 2 Tim. 3:16, 17)
- Pendeni Abasololwesi 7:1-25.
Kani cindo tungasambililako ku balalume 300 abatwalilile ukulukulaba ukupusanako na babo abali ne mulele? (Sol. 7:3, 6; Loma. 13:11, 12; Efes. 5:15-17)
Koti nifyefyo abalalume 300 basambilile ili balukuceba kuli Gidyoni, kani fwebo tungasambilila syani ili tuceba kuli Gidyoni Umukulu, baYesu Klistu? (Sol. 7:17; Mat. 11:29, 30; 28:19, 20; 1 Pet. 2:21)
Kani Abasololwesi 7:21 balatofwa syani ukuba abasangalele ili twatumwa mu kupyunga ukuli konse mu kwansika kwa baYehoba? (1 Kol. 4:2; 12:14-18; Jako. 4:10)
- Pendeni Abasololwesi 8:1-3.
Ili twapusana ne mukwasu neli ne nkasi, findo tungasambililako kufi Gidyoni apikulwile ukukatasya ukwalipo ne baEfilayimi? (Ifisi. 15:1; Mat. 5:23, 24; Luku 9:48)
