MPANJI 52

Gideyona niAntu Jindi 300

WUNELUKI chuma chinakuzatika aha? Awa ejima hiyamayala anjita akuIsarela. Amayala anakunoñama nakunwa menji. Iwu iyala wunemani mukamwihi nawu diyi nsompeshi Gideyona. Nakuyitala chanakunwawu menji.

Talaña jinjila jashiyañana awamayala janakunwinamu menji. Amakwawu anakunoñamina nyitu yawu mumenji mwamweni. Ilaña wumu nakukabula menji nachikasa chindi, kulonda kwikala wasoñama kuyuma yinakumwekana. Ichi chalema, muloña Yehova walejeli Gideyona kusakula hohu amayala akunwa menji iku enda atalatala. Awa anashali Yehova wahosheli nindi, atela kuyifuntisha kumukala. Tutalenu muloña waweni.

A Isarela adi cheñi mukukala kwakweni. Muloña wakwila nawu, hiyamwovwahilili Yehovaku. Antu akuMidiyani anekali nañovu hadi wena nawa anakuyikatisha. Dichi aIsarela hiyakumudilila Yehova kulonda ayikwashi, nawa Yehova hakutiya kudila kwawu.

Yehova hakuleja Gideyona kusenda amashidika, dichi Gideyona hakukuñulula antu anjita 32,000 hamu. Ilaña kudi izaza dawantu anjita 135,000 akulwa naIsarela. Ilaña Yehova hakumuleja Gideyona nindi: ‘Wudi nawantu amavulu.’ Muloñadi Yehova chahosheleliyi ichi?

Muloña wakwila nawu, neyi aIsarela ashindili njita atela kutoñojoka nawu ashindili awenawu. Atela kutoñojoka nawu hiyakeñeli wukwashu waYehovaku. Dichi Yehova hakumuleja Gideyona nindi: ‘Lejaku amayala ejima anatiyi woma afunti kumukala.’ Chanayilejiyi Gideyona, amayala anjita 22,000 hiyakufunta kumukala. Hakushala nawantu 10,000 kulonda alwi namashidika ejima 135,000.

Ilaña, tiyaku! Yehova hakuhosha nindi: ‘Wuchidi nawantu amavulu.’ Dichi hakumuleja Gideyona nindi lejaku amayala ejima anwi menji mukaloña, wufuntishi ejima akunwa menji nakanwa kawu mukaloña. Yehova hakumukana nindi, ‘Nukwilisha wushindi nawamayala 300 owu akwikala asoñama hakunwa menji.’

Mpinji yakulwa yinashiki dehi. Gideyona hakwambula antu jindi 300 mumazaza asatu. Hakuyinka antu jindi ejima mpuña ninsaba yikweti inoñu mukachi. Chashikili hakachi kawufuku, wejima wawu apompeli nakunyeñumuka chilombu chawayilumbu jawu. Dichi hampinji yoyimu, wejima wawu hiyakwimba mpuña jawu nakubalula nsaba jawu nakubidika nawu: ‘Mpoku yakabali yaYehova niyaGideyona!’ Chanahindukiwu ayilumbu jawu, hiyakuluwankana nakutiya woma. Wejima wawu atachika nikutemuka, aIsarela hiyakushinda ndombu.

Ansompeshi kapetulu 6 nakushika ku 8.