¿NTILA, mo ntlome tiʼ nbʼaj kye xjal tzalu? Aj Israel qeju soldad lu. Ma chi kubʼ mokʼeʼ qejo xjal lu tuʼn kykʼan (kykʼwan) aʼ. Aju waʼl kytxlaj atzun jwes Gedeónju. Nxqʼuqin kyiʼj tzeʼn chi kʼan aʼ.

Qʼonkxix twitza tiʼj alkyechaq tten nchi kʼan qejo xinaq tiʼj aʼ. Ateʼqe junjun njatz kykʼaʼn aʼ tukʼe kytziʼ. Atzun jun kyxol jlu naq tukʼe tqʼobʼ njatz tiʼn aʼ tuʼn tkʼan, tuʼntzun tlonte tiʼ nbʼaj ttxlaj. Nim toklen jlu, quʼn ma tzaj tqʼamaʼn Jehová te Gedeón qa oʼkx tuʼn kyjaw tskʼoʼn qejo nchi xqʼuqin aj kykʼan aʼ. Aqetzen txqantl iltiʼj tuʼn kyanj meltzʼaj kyja. Qo xnaqʼtzan tiʼj tiquʼn.

Otaq tzaj juntl maj mya bʼaʼn kyiʼj aj Israel tuʼnju mitiʼ okx kybʼiʼn Jehová. Mas nim kyipumal qe aj Madián kywitz qe aj Israel, tuʼntzunjo ok kybʼinchen mya bʼaʼn kyiʼj. E oktzun ten aj Israel qanil onbʼil te Jehová, ex e tzaj ttzaqʼweʼn Jehová.

Tzaj tmaʼn Jehová te Gedeón tuʼn ttzaj tjyoʼn jun kʼloj soldad, tuʼntzujo e bʼaj tchmoʼn 32.000 soldad. Naqtzun tuʼnj at 135.000 kybʼet ajqʼoj kyiʼj aj Israel. Atzunte Jehová tzaj tqʼmaʼn te Gedeón: ‹Nim xjal ukʼlen tuʼna›. ¿Tiquʼn tzaj tqʼamaʼn ikjo?

Tuʼnju qa ma che kanbʼanteq aj Israel, jakule txi kyximen qa tuʼnx kyipun ma che kanbʼan ex qa nya iltaq tiʼj tuʼn kytzaj onen tuʼn Jehová. Tuʼntzunju, tzaj tqʼamaʼn Jehová te Gedeón: ‹Qʼamanxa kye xjal aqeju in che luʼlun tuʼn kyxobʼil tuʼn kyaj kyja›. Tej tbʼant jlu tuʼn Gedeón, e anj 22.000 soldad kyja. Naq oʼkx 10.000 e kyaj ten tuʼn kybʼiyen kyukʼe 135.000 ajqʼoj.

¡Bʼinxe!, aju tzaj tmaʼntl Jehová te Gedeón: ‹Nimx kybʼet xjal›. Tuʼntzejo, xi tqʼamaʼn te tuʼn kykux tiʼn qe ichin tuʼntzun kykʼan ttziʼju aʼ lu ex tuʼn kyanj tsamaʼn kykyaqil qejo njatz kykʼaʼn a tukʼe kytziʼ. ‹Kyuʼn qeju 300 xinaq aqeju tuʼn kyqʼabʼ ẍi kʼan aʼ ex ma chi xqʼuqin, kxel nqʼoʼne qe aj Madián toj kyqʼabʼe›, chi Jehová.

Pontzun tqʼijlalil qʼoj. Kubʼ tpaʼn Gedeón qejo 300 soldad te oxe kʼloj. Xi tqʼoʼn jun twiʼ tukʼa ẍneʼl, ex jun xar nkʼant qʼaqʼ toj teyele te junjo soldad. Tej chʼixtaq tpon tmij aqʼbʼel, kykyaqil soldad ok kychmoʼn kyibʼ tiʼjele kytembʼil ajqʼoj. Junxtzun jaw tqʼajqʼojil twiʼ tukʼa rit kyuʼn ex kubʼ kybʼuchin qe xar ex e jaw ẍchʼin: ‹¡Aju qʼoj lu te Jehová ex te Gedeón!› Tej tel kywatl qe ajqʼoj, i kubʼ tzpet (tzʼopet) ex e tzaj xobʼ. Kykyaqilx i el oq ex e kanbʼantzun aj Israel kyibʼaj.