Sturka 52

Gidiun Bara Ai Aiklaklabrika 300 Ba

NAHA ra dia taki ba kaikisma? Naha Israel war aiklaklabrika nani sa. Ai lula kriki nani ba li di bangwisa. Wihta Gidiun ba witin nani lamara buisa. Witin nani nahki li di bangwi ba kaikisa.

Kais waitnika nani kum kum ba sat wala di ba. Kum kum nani ai mawan ba li kat mangki disa. Sakuna kum ba li ai mihta ra panki ai bila ra mangki disa, ai tnaya nani ra dia taki ba kaikaia dukyara. Naha daukanka ba aitani kan, kan Jehova mita Gidiun ra win ya nani li di ai tnaya nani ra aihwaki kaiki nani ba baman bribia. Wala nani ba kli ai watla ra wabia win. Kaisa kaikaia dia muni sapa.

Israel uplika nani ba kli trabil nani ra dimi bangwan, kan Jehova bila walras kan. Median uplika nani ba witin nani wal kau karna takan, bara saura muni kan. Baha mita Israel uplika nani ba Jehova ra help makaban, bara Jehova mita makabanka ba walan.

Jehova mita Gidiun ra war aiklaklabra dakni kum pliki bribia win, bara 32.000 nani baku brin. Sakuna Israel mapara aiklabaia 135.000 daknika kum bara kan. Ban sakuna Jehova Gidiun ra win: ‘Man upla uba ailal brisma.’ Dia muni baku win?

Kan Israel uplika nani ba war aiklabi pura lui bangwbia sa kaka, witin nani silp aiklabi win takan lukaia kan, Jehova helpka ba nit apia sa lukaia kan. Baha mita Jehova Gidiun ra win: ‘Ya sibri nani ra wis mahka ai watla ra wabia.’ Gidiun baku daukan pyua ra, 22.000 war aiklaklabra nani ba kli mahka wan. Baku bara 10.000 waitna nani takaskan, 135.000 nani ba mapara aiklabaia.

Sakuna Jehova mita win: ‘Kau ban upla ailal brisma.’ Baku bara Jehova mita Gidiun ra win naha laya na wina waitnika nani ba yarka dibia, bara ani waitnika ai mawan ba li kat brisi dibia ba, mahka watla ra blikbia. Ban sakuna Jehova witin ra pramis munan: ‘Man bara waitna 300 nani li di kan pyua ra aihwaki kaiki kan ba wal ra, aiklabi pura luanka ba maikamna.’

Aiklabaia pyua aimakan. Gidiun ai aiklaklabrika 300 ba, dakni yuhmpa ra baiki sakan. Waitna kumi banira syîp aringka bara sumi kum bilara awas buhki yaban. Tihmia lilapasra, ai waihla nani kyampka tnaya ba kutbi brin. Bara witin nani sut sim pyua ra, syîp aringka nani ba puhbi, sumi nani ba baiki ai pura wini naku aisi kan: ‘Jehova bara Gidiun sordka ba!’ Waihla nani ba sirang iwi, bui sut plapi bangwan, bara Israel uplika nani ba pura lui bangwan.

Wihta nani sapta 6 wina 8 ba kat.