¿KOTO ndáaña kéʼé na̱yóʼo? Na̱yóʼo kúú na̱ xíka nu̱ú ku̱a̱chi ña̱ ñuu Israel. Koto na̱ xíʼi ti̱kui̱í. Ta̱ juez Gedeón níndichi yatinra xíʼinna ta xítora nda̱saa xíʼina ti̱kui̱í.

Koto kǒo inkáchi xíʼi na̱yóʼo ti̱kui̱í. Savana xíkuxítína ta nda̱a̱ nu̱ú ti̱kui̱í xínu̱u yu̱ʼu̱na xíʼinará. Soo inkana xíʼin ndaʼa̱vana xíʼinará, ña̱kán va̱ʼa kíʼinna kuenta. Jehová ni̱ka̱ʼa̱nra xíʼin ta̱ Gedeón ná kiʼin va̱ʼara kuenta xíʼin na̱ xíʼi ti̱kui̱í, ña̱kán va̱ʼa ndaka̱xinra na̱ kíʼin kuenta tá xíʼinará. Ta na̱ kǒo íxaa saá ná ndikóna veʼena. Ná kotoyó ndachun ni̱ka̱ʼa̱n Jehová saá.

Ku̱a̱ʼání tu̱ndóʼo ndíka̱a̱ tuku na̱ ñuu Israel chi kǒo kándíxakana Jehová. Na̱ ñuu Madián ndu̱ndakúkana nu̱ú na̱ ñuu Israel ta íxandi̱va̱ʼana xíʼinna. Xa̱ʼa ña̱yóʼo ndúkúna ndée nu̱ú Jehová, ta xíniso̱ʼovara ña̱ káʼa̱nna xíʼinra.

Jehová ni̱ka̱ʼa̱nra xíʼin ta̱ Gedeón ná nandukúra na̱ ku̱ʼu̱n nu̱ú ku̱a̱chi, ta̱ Gedeón sa̱ndátakara 32,000 na̱ ku̱ʼu̱n nu̱ú ku̱a̱chi. Soo 135,000 kúú na̱ soldado na̱ ñuu Madián na̱ kúni̱ kanitáʼan xíʼinna. Soo Jehová ni̱ka̱ʼa̱nra xíʼin ta̱ Gedeón: ʼKu̱a̱ʼání kúú na̱ sa̱ndátakaún na̱ ku̱ʼu̱n nu̱ú ku̱a̱chiʼ. ¿Ndachun ni̱ka̱ʼa̱n Jehová ña̱yóʼo?

Saáchi ná kuchiñu na̱ ñuu Israel kanitáʼanna xíʼin na̱ ñuu Madián, ta ka̱ʼa̱nna saá: “Xíʼin ndée miívandi̱ na̱kuchiñundi̱ ka̱nitáʼanndi̱ xíʼinna, kǒo níxiniñúʼundi̱ ndée Jehová”. Xa̱ʼa ña̱yóʼo ni̱ka̱ʼa̱n Jehová xíʼin ta̱ Gedeón: ʼKa̱ʼa̱n xíʼin ndiʼi ta̱a na̱ yíʼvi ná nu̱ʼu̱na veʼenaʼ. Tá ni̱ka̱ʼa̱nra xíʼin na̱yóʼo, ta 22,000 kúú na̱ ku̱a̱nu̱ʼu̱ veʼena. Soo 10,000 kúú ta̱a na̱ ni̱ndo̱o ku̱ʼu̱n kanitáʼan xíʼin 135,000 soldado ña̱ ñuu Madián.

Soo tuku ni̱ka̱ʼa̱n Jehová: ʼNi saáví ku̱a̱ʼá tá ku̱a̱ʼákava kúúnaʼ. Ña̱kán ni̱ka̱ʼa̱nra xíʼin ta̱ Gedeón ná ka̱ʼa̱nra xíʼin na̱yóʼo koʼona ti̱kui̱í yu̱ta. Ta ndiʼi na̱ xíkuxítí ta nda̱a̱ nu̱ú ti̱kui̱í xínu̱u yu̱ʼu̱na xíʼinará, na̱yóʼo ná nu̱ʼu̱na veʼena. ʼChindéi̱ yóʼó xíʼin 300 ta̱a na̱ kǒo níxi̱nu̱u yu̱ʼu̱ nda̱a̱ nu̱ú ti̱kui̱í tá xi̱ʼinará, ña̱ va̱ʼa kanitáʼanndó xíʼin na̱ ñuu Madiánʼ, káchi Jehová.

Tá ki̱xa̱a̱ tiempo ña̱ kanitáʼanna. Ta̱ Gedeón u̱ni̱ nda̱taʼvíra na̱ 300 yóʼo. Ta̱xira iin ndiki̱ xíʼin iin ki̱si ta ini ña̱yóʼo ndíka̱a̱ tú yití ta̱xira ndaʼa̱ iin iinna. Tá xa̱kuyatin sava ñu̱ú, nda̱taka ndiʼi na̱ ñuu Israel nu̱ú ndóo na̱ ñuu Madián. Tasaá, inkáchi ti̱vi ndiʼina ndiki̱ ta ta̱ʼvína ki̱si ta ka̱na kóʼóna: ʼNa̱ kanitáʼan xíʼinndó kúú Jehová xíʼin ta̱ Gedeónʼ. Tá ndu̱kaxi-ini na̱ soldado yóʼo, ni̱yi̱ʼvínína ta sa̱nanu̱ú táʼanna. Xi̱nu ndiʼina ku̱a̱ʼa̱nna, ta na̱ ñuu Israel na̱kuchiñuvana xíʼin na̱yóʼo.